Sâbıkā Sadrıaʿzam Kethudâsı olan es-Seyyid İbrâhîm Efendi itmâm-ı hidmet ile Ordu-yi hümâyûn'a ʿavdet edüp, münhal olan mansıb-ı Defterî'nin hakkında tehallüfü, sebeb-i ye's ü hırmân ve Âsitâne'ye ʿazîmet içün dâmengîr-i istîzân olup, tahsîl-i ruhsat ʿakabinde Âsitâne-i saʿâdet'e pâ-nihâde-i vusûl ve teskîn-i üvâm-ı hasret etmeden me'mûr-i ʿavd u kufûl olup, Ordu-yi hümâyûn'a geldikde, Nişancılık'a ilhâk olunan Rûznâmçe-i Evvel mansıbı ifrâz ve Efendi-yi mûmâ ileyhe tevcîh ile mazhar-ı iʿzâz kılındı. Sügūr-i İslâmiyye'de Serʿasker ve muhâfız bulunanların tehâvün ü taksîrleri şâyiʿ ve taʿyînât ve sâyir meclûbâtdan gayri fikr u mülâhazaları olmayup, iki üç seneden berü bezl olunan emvâl ve zehâyir ki, hisâbında erbâb-ı kalem ü rakam mütehayyirdir, bi'l-cümle telef ü zâyiʿ olduğundan başka, çep ü râstlarından aʿdâ eyyâm-ı şitâda kayıklar ile berü tarafa geçüp, ehl-i İslâm ve reʿâyâyı refte refte giriftâr-ı kayd-ı isâr ve karşuya imrâr ile ikdâm ve cür'et izhâr edüp, mânend-i havâlif ü ʿacâyîz-i müdâfaʿadan dermânde ve ʿâciz oldukları, sebeb-i kalak u iztırâb Sadr-ı vâlâ-cenâb olmağla, Rumeli Vâlîsi ve Maçin Muhâfızı Vezîr ʿAbdî Paşa'ya ve Hırsova Muhâfızı Vezîr Sâdık Paşa'ya bu keyfiyyetleri şifâhen inhâ ve muhâfaza-i etrâf ve karşuya mürûr esbâbını iktinâf irâdelerini beyân ile fî-mâ baʿd aks-i kazıyye rû-nümâ olduğu hâlde, cevâba kudret-yâb olamayacağlarını sâmiʿalarına [M2 156] ilkādan fazla, o taraflarda vâkiʿ olan ahvâli hakīkati üzere sırran inbâ etmek zımnında müşârun ileyhimânın Kapu Kethudâları taraflarına isrâ olunmuşidi. Tıbk-ı me'mûriyyetleri üzere o cânibe ʿazîmet ve ifâde-i keyfiyyet eylediklerinde, asker ve cihât-ı uhrâ ile ʿadem-i kuvvetlerin serd ü beyân ve ikdâr olundukları sûretde bezl-i cân edeceklerini âverde-i zebân ve ikāmetlerinde bir fâ'ide olmadığını cezm ü îkān ile Ordu-yi hümâyûn'a ʿatf-ı ʿinân eylediler.