İsmâʿîl'de ihtişâd eden kefere-i bed-nihâd zilhiccenin on sekizinci gicesi kayıklar ile Tulça'ya bir sâʿat mesâfe Değirmen-boğazı dimekle maʿrûf mahalde ʿarz-ı sevâd eyledikleri, karagollar tarafından muhâfazada bulunan Mîr-î mîrân Ferâşeli-zâde Mehmed Paşa'ya ve Ser-seksonî Halîl Ağa'ya ihbâr ve anlar dahi mevcûd-i maʿiyyetleri olan bin beş yüz kadar süvârî ve piyâde ile âmâde-i ceng ü peykâr olduklarından gayri, Ordu-yi hümâyûn ve Hân tarafından istimdâd niyyeti ile leylen sâʿat yedide üç top atup, keyfiyyeti zımnen işʿâr etmişler idi. Düşmen-i dîn asker-i haybet-eserini üç kol edüp, şeb-i târda top atmaksızın tüfeng sadâlarıyla müstahfızları tahdîş ve Tulça Kasabası'na hücûm ile tevlîd-i teşvîş edüp, zalâm-ı leyl kemmiyyet-i aʿdâyı farka mâni olduğundan, kesret-i aʿdâ hulyâsıyla ehl-i İslâm Paşa Tabyası'na tehassun ve müdâfaʿa-i aʿdâ zımnında ibrâz-ı şart tesebbüt ü temekkün etmişidi. Düşmen askerinin bir mikdârı harbe kıyâm ve bir mikdârı Mustafa Paşa Tabyası'nı zabtdan sonra [M2 150] Tulça Kasabası'na girüp, nehb ü gārete ikdâm ve reʿâyâyı kayıklara imlâ ve tabyada buldukları topları Nehr-i Tuna'ya ilkā eylediler. Sadây-ı top Hân tarafından Serdâr-ı ekrem tarafına inhâ ve Sadrıaʿzam dahi baʿzı karâyin ile keyfiyyete âşinâ ve fi'l-hâl Hân tarafına imdâd içün haber irsâl ve meştâda bulunan harb ü darb erbâbından bir mikdâr askere Kul Kethudâsı, baş nasb ve o tarafa îsâl olundu. Tertîb-i olunan asker mahalline varıncaya dek küffâr maslahatını ikmâl ve imdâd zuhûru ihtimâliyle İsmâʿîl'e doğru nakl-i eskāl eyledi. Bu haber-i bârid Sadrıaʿzam tarafına vârid oldukda, kasaba-i mezkûreye istihkâm verilinceye dek, Kul Kethudâsı ve Sipâh Ağası'na Tulça'da ârâm etmek irâdesi ifhâm olunup, maʿreke-i mezbûrede üç yüz kadar eşrâr-ı küffâr mücâvir-i ehl-i nâr ve ehl-i İslâm'dan iki yüz mikdârı merd-i nâmdâr hılʿat-i gülgûn-tırâz-ı şehâdet ile ʿâzim-i dâru'l-karâr oldu. Serdâr-ı ekrem hazretleri bu cengde mecrûh olanları bahşîş ile taltîf ve yararlığı nümûdâr olanları guzâtın çeleng ü hılʿatler ile devâʿî-yi şevk u himmetlerin tazʿîf eyledi.