Sadr-ı sabık vaktinde meştâ tertîbâtından olarak Bolu havâlîsinden bin nefer mîrîlü asker tahrîri Voyvodası Yûsuf Bey'e fermân ve lâzım gelen mebâliği nakden irsâl olunup, bir ân akdem cemʿ u tesyîri ifâde vü beyân olunmuşidi. Mîr-i mûmâ ileyh emr-i ʿâlîye imtisâl ve tevzîʿ-i mîrî ile cemʿ-i ibtâl-i ricâl edüp, Genç ʿAli nâmında bir şahsı üzerlerine baş ve ber-vech-i evfâ tahsîs-i meʿâş ile esnây-ı râhda ferd-i âferîdeye teʿaddî zuhûrunda mazhar-ı cezâ ve pâ-dâş olacağı râzını merkūma fâş edüp, [mısrâ]: Lekad nâdeytü lev esmaʿte hayyen mefhûmu üzere merkūmun pend ü nasîhatini ʿadem-i kabûl ve seyr-i batî ile yollarda fukarâyı pâ-zede-i suyûl-i huyûl eylediği havâdisi, semʿ-i Serdâr-ı ekremî'ye vusûl bulup, Ordu-yi hümâyûn'a geldikde, ser-i nuhûset-eserine havâle-i seyf-i siyâset ve mahall-i ʿibret-i erbâb-ı zulm ü gavâyet kılınup, Bin-başılık maslahatını idâre içün Baş-ağası ihzâr ve hılʿat ilbâsıyla zabt-ı neferât etmek tenbîhi ile inzâr olundu.