Ordu-yi hümâyûn'da Cebeci-başı olan Kürd Mehmed Ağa 'azl olunup, maʿzullere 'âdet olduğu vech üzere sevk-i zehâyir ʿunvânıyla Babadağı'ndan ihrâc ü ibʿâd ve Cebeci-başılık ile Baş-kethudâ Mustafa Ağa isʿâd olundu. Eyyâm-ı behâr hulûl ve Ordu-yi hümâyûn'un sahrâya hurûcu vakti duhûl edüp, tavâyif-i askerînin iki kıst mevâciblerinin lüzûm-i iʿtâsı bundan akdem Rikâb-ı kâm-yâb tarafına 'arz ü inhâ olunduğuna binâʾen, mevâcib ve sâyir umûr-i seferiyyeye sarf içün zilhiccenin altıncı günü [1] iki bin dört yüz kîse akça vâsıl-ı Muʿasker-i Şehriyâr-ı rubʿ-meskûn ve dâhil-i hazîne-i Ordu-yi hümâyûn oldu. Silahdâr Ağası zahîre mübâşiriyyeti ile bundan akdem tağrîb ve yerine Ocağ Kethudâsı vekâleten takrîb olunmuşidi. İle'l-ân Ağalık mesnedi hâlî olmak takrîbî ile resânende-i hazîne olan Kapucu-başı Kuru İbrâhîm Ağa'nın Silahdâr Ağalığı'yla şecer-i zâyil-i ikbâli tartîb ve mâh-ı zilhiccenin on yedinci günü [2] iki kıst mevâcib dahi ihrâc ve eyâdî-yi emânet-kârâne idrâc olundu.