Yergöğü tarafında vâkiʿ olan tuğyân, düşmen-i bed-peymâna vesîle-i tâb ü tüvân olup, bir mikdâr asker ile kalʿa-i mezkûreyi [M2 148] istihlâs dâʿiyesiyle tahrîk-i pây-i melʿanet ve müceddeden o tarafa Serʿasker nasb olunan ʿİzzet Ahmed Paşa dahi vukūʿ bulan ihtilâl ü fetret ve Sultân ve askerinin ekserîsi Ruscuk tarafına geçüp, bu esbâb-ı rediyye Yergöğü'nün yed-i aʿdâya giriftâr olmasına ʿillet olacağını fikr ile bu emr-i mekrûhda bulunmamak kasdını derpîş eyleyerek, seyr ü hareketde bi'l-ıztırâr irtikâb-ı betâʾet etmişidi. Hasm-ı ʿanîd zilkaʿdenin on dördüncü cuma günü top ve edevât-ı sâyire ile nâ-gâh Bükreş tarafından bedîd olup, cünd-i İslâm dahi hâric-i kalʿadan mukābele ve birkaç dakīka mukātele edüp, düşmenin ateşine ʿadem-i tahammül ile meterislerden hurûc ve hisara vülûc eyledikleri hâlde, düşmen hisarı mukaddemce nişân-gâh eylediğinden, nice merd-i saʿîdî top ile şehîd ve mukaddemâ Mehmed Paşa vakasında mecrûh-i dest-i bî-dâdiyân olan Yergöğü Ağası'nı dahi dâyire-i hestîden nâ-bedîd eyledi. Kalʿada bir senelik zâd ve vücûd-i mühimmât ile harbe istîʿdâd derkâr olduğundan, cünûd-i muvahhidîn oldukça kalʿanın baʿzı mahallerini tarsîn ile âmâde-i ceng-i müşrikîn olumuşlar idi. Ancak kalʿa fi'l-asl mütezelzil ve sademât-ı topa gayr-i mütehammil olduğundan, fekat üç gün kadar hevl-i cenge müsâberet ve bu müddetde kalʿa top ve humbara darbından kalb-i ʿâşık gibi vîrân ve sîne-i erbâb-ı hüner gibi dağdâr-ı akrân olup, nâ-çâr ʿahd ü peymân ile kalʿayı düşmene teslîm ve Ruscuğ'a geçüp, vukūʿ bulan ahvâli Serdar-ı ekrem tarafına tefhîm eylediler. Hâdise-i mezkûre müşârun ileyhin evâyil-i sadâretlerinde ser-nümâ-yı zuhûr olduğundan, şîşe-i hâtırı meksûr ve bi'l-külliyye bî-sabr u şuʿûr olup, cümleyi huzûruna daʿvet ve vukūʿ bulan keyfiyyeti ifâde ile düşmen bundan sonra Kulle Kalʿası'na ve Yergöğü'ye müstevlî olanlar Ruscuk taraflarına hasârete cesâret edeceklerin îmâ ve ne gûne tedbîr lâzım geldiğin istıksâ eyledikde, Ruscuk ve Niğbolu taraflarında ʿİzzet Ahmed Paşa ve Kāyim-mâkām-ı sâbık el-Hâc Ahmed Paşa mevcûd ve maʿiyyetlerinde vâfir cünûd olup: “Herkes semtini muhafazaya bezl-i mechûd edecekleri muhakkakdır” dediklerinde, Serdar-ı ekrem hazretleri kelâmlarını tasdîk etdiyse dahi, o havâlîye imdâd etmedi şâʾibesinden istinkâf ile yerlerinden henüz hareket eylemeyen askeri ihrâc ve zahîre mübâşirlerini tazyîk u izʿâc zımnında zevât-ı müteşahhısadan [M2 149] bir kimsenin meʾmûriyyetini tasvîb ve Çavuşbaşı Ağa'nın ikdâm ü gayreti mücerrebi olduğundan, mûmâ ileyhi bu hidmete takrîb eyledi. Bu re'y-i rezîn huzzâr-ı meclis tarafından tahsîn ve birkaç nefer Zaʿîm ve Turnacı beş on kadar Telli-Çavuş, Ağa-yı mûmâ ileyhin maʿiyyetine taʿyîn olundu.