Silahdâr Ağası olan İbrâhîm Bey ʿan-asl Sadr-ı sâbıka müntesib ve her hâlde tarafına mütemâyil ü müncezib olup, müşârun ileyhin Sadâret'den infısâli sebebi ile mûmâ ileyh dahi istiskāl ve Çavuş-başılığı'nda tîmâr ve zeʿâmete dâ'ir zann ü hayâli mûcib baʿzı ahvâl tarafına isnâd olunarak, Tırnova taraflarında sevk-i zehâyir maslahatı ile Ordu-yi hümâyûn'dan ibʿâd ü tecnîb ve Teşrîfâtî Bekir Bey Kartal vakʿasında kāle getürdiği re'y-i sahîf sebebi ile Samakov'a nefy ü tağrîb olundu. Müverrih Enverî Efendi, Kethudâ Bey sevkiyle Teşrîfâtçılık hıdmetiyle mazhar-ı nevâziş ve Silahdâr Ağalığı taʿyîn edinceye dek vekâleti Ocak Kethudâsı'na sipâriş kılındı.