ʿAkīb-i mevâcibde Sadrıaʿzam olanlara Şehriyâr-ı vâlâ-nijâd tarafından irsâl-i teşrîfât muʿtâd olduğuna binâ'en, münâsebet-i mahal iltizâmıyla bir re's müzeyyen esb ve bir re's müzeyyen bârgîr ve yirmi ʿaded at Sadrıaʿzam birâderi Mîrâhûr-i Sânî Hüseyin Bey ile Ordu-yi hümâyûn'a irsâl ve Mîr-i mûmâ ileyhin Babadağı'na tekarrubu istidlâl olunup, Kethudâ Bey ve Çavuş-başı Ağa Yemeklik çeşmesinde mehterhâne ile istikbâl ve kemâl-i tevkīr ile Serây-ı Sadriaʿzamî'ye îsâl eylediler. [M2 147] Sadr-ı müşârun ileyh hutuvât-ı iclâl ile hatt-ı hümâyûnu ahz ve sûde-i çeşm-i ibtihâl ve hançer-i mücevheri bend-i kemer-i ikbâl eyleyüp, tetmîm-i levâzım-ı cihâd ü gazâ ve muhâfaza-i sügūr u enhâya mûcib-i hass ü iğrâ olan hatt-ı hümâyûn ʿalâ rü'ûsi'l-eşhâd kırâʾet ve mazmûn-i münîfi cümleye bâʿis-i şevk u kuvvet olup, yek-dil ü zebân duʿây-ı bekāy-ı Şâhâne'yi resîde-i eyvân-ı keyvân eylediler.