Bükreş'de hudûs eden vâkıʿa-i fâciʿa sebebi ile cism-i maslahat muʿtel ve mizâc-ı asker muhtell olarak, düşmen ihtilâs-ı fursat ve Yergöğü'ye itâle-i dest-i mazarrat eyleyeceği ihtimâli, hâtır-hırâş-ı Sadr-ı vâlâ-menkabet olup, Ruscuk Serʿaskerliği'ni idâreye kādir o havâlîde bir Vezîr-i müdebbir ü mutebassır bulunmadığından, Kethudâ Bey de vücûd-i tavr-ı meʾnûs ile bu hatb-ı ehemme liyâkat-i mahsûs olmağla, zilkaʿdenin yedinci sebt günü mûmâ ileyh bâ-rütbe-i Vezâret Ruscuk cânibi Serʿaskerliği'yle sebk-i akrân ve üç beş gün zarfında kapusunu tanzîm ve savb-ı mezkûre sevk-i yek-rân-ı ʿizz ü şân eyledi. Kethudây-ı sâbık Resmî el-Hâc Ahmed Efendi'nin mişvârı maʿlûm ve ʿakl ü dirâyeti müsellem-i erbâb-ı fuhûm olduğundan gayri, ahvâl-i ʿâleme muttaliʿ ve eser-i re'yinden herkes müntefiʿ olup, târih-âşinâ ve birkaç defʿa sefâretle Avrupa'ya gidüp, kefere devletlerinin dahi hallerine vukūf peydâ etmiş bir zât-ı yektâ olmağla, hemân o günkü gün Sadâret-i ʿuzmâ Kethudâlığı'yla kemâ-kân cezlân ve mutasarrıf olduğu Rûznâme mansıbı Nişancılık ile idâre-i umûr-i zarûriyyesinden ʿâciz olan Reʾîsülküttâb-ı esbak ʿAbdullah Efendi'ye ber-vech-i ilhâk tevcîh ü ihsân kılındı.