Müşârun ileyh Hotin vakʿasında Serʿasker iken sâyirleri gibi bu dahi bir maslahata muvaffak olamayup, kâr-şinâsî ve reviyyet ile verdiği şöhret-i ʿavâm, askerî miyânında cübn ü rehâvet belki mahz-ı ihânet maʿnâlarına haml olunup, bundan sonra Bükreş istihlâsı içün tehaşşüd eden askere Başbuğ nasb ü taʿyîn ve bir ân akdem hareket eylemesi tenbîh ü telkīn olundukda, Gölbaşı ve Kartal hâdiselerinden Bükreş üzerine düşmen geleceğini tehayyül ile refte refte kâr u bârını Ruscuk ve Silistire taraflarına nakl ü imrâr ve kendüsü dahi meşîme-i ʿâlem-i kevn ü fesâddan tevellüd edecek ahvâle intizâren celse-i müstevfiz sûretinde [M2 144] karar ve bu reftâr-ı nâ-hencâr, askerî tâyifesine Hotin vakʿasında olan isnâdâtı tezkâr edüp, cümle nâs kendüden müteneffir ve kulûb-ı câsiyelerinde kîn ve husûmet müstekarr olmuşidi. Düşmen büyük orduya mukābele niyyeti ile etrâfda olan müteferrik askerini cemʿ ve baʿzı mahûf mahallere birkaç top ve ekall-i kalîl âdem vazʿ ve bu mülâbese ile Bükreş taraflarını dahi ifrâğ eylediği haberi mukaddemâ Bükreş Voyvodasına iblâğ olunup, bilâ-hâyil kasabaya dâhil ve Moskovlu maslahatına temşiyet ve İbrâ'îl'i âverde-i dest-i melʿanet eyledikden sonra, matmah-ı nazarı olan Bükreş'e bir mikdar asker irsâl ve ednâ mertebe ceng ü cidâl vukūʿ bulmadan müşârun ileyh berü tarafa ve Voyvoda Krayova'ya irtihâl etmişler idi. Mesʿûd Girây cemʿ etdiği asker ile Yergöğü tarafına geçüp, birkaç defʿa aʿdâ ile cenge ikdâm ve neyl-i zafer ile şâd-kâm olduğunu tavâyif-i askerî Serʿasker Paşa'ya işʿâr ve bizzât kendülerinin dahi karşu tarafa mürûr ile cünûd-ı muvahhidîni iʿmâl eylemeleri ihtâr olundukda, askerin ʿadem-i sebât ü istikrarını tecribe vü imtihân eylediğinden, hareketi istihsân etmeyüp, Ruscuk'dan imdâd ü iʿâneyi iltizâm ve ʿözr ü behâne ile halkı ilzâm semtine ihtimâm edüp, giderek düşmene kesret cihetiyle kuvvet ve ehl-i İslâm'a kıllet sebebi ile vehn ü rehâvet ʿârız olup, asker iltimasda ısrâr ve müşârun ileyhi hezâr lâbe vü firîb ile karşuya imrâr eylediler. Müşârun ileyh nehâran Yergöğü'ye ve leylen Ruscuğ'a âyib ü zâhib ve bu vazʿ-ı garîb bi'l-külliyye ihtilâli mûcib olup, bu sûret ber-karar olursa: “Cümlemiz Ruscuğ'a ʿubûr ile kalʿayı ihlâ ederiz” peyâmı, lisân-ı askerden zarf-ı gûşuna ilkā olundukda, terk-i kalʿadan tersân ve lisân-ı kazâ [mısra]: Garrûke hattâ sırte te’menü şerrehüm me'âlini hakkında gûyâ olarak Yergöğü tarafına ʿatf-ı ʿinân eyledi. Aʿyân-ı asker ve zâbitân-ı leşker sû-i kasd-ı askerden bî-haber olarak icrây-ı resm-i istikbâl içün iskeleye doğru rekz ve hervele ile iʿtizâm ve neferât dahi kāt ender kāt güzergâh-ı müşârun ileyhi ihâta ile selâma intizârlarını îhâm edüp, müşârun ileyh iskeleye kādim ve evzâʿ-ı askerden kasd-ı bed emâresini fehm ile geldiğine nâdim olup, nâ-çâr kalʿaya doğru ʿazîmet ve süfehây-ı askerî sell-i seyf ile üzerine hücûm edüp, [M2 145] kurbunda olan mahzene duhûl ve çâre-cûy-i semt-i selâmet oldukda, [mısrâ]: İnne'l-firâre lâ-yüzîdü fi'l-ecel meâlî üzere mahall-i merkūmda o Vezîr-i müşterî tedbîri küşte-i tîg-i gadr u tezvîr eylediler. Eşrâr-ı askerin hücûmu hılâlinde Ordu Ağası Ahmed Ağa ve Yergöğü Ağası tevâbiʿleriyle ile menʿ sadedinde olduklarıyçün Ordu Ağası'na dahi kılıç üşürüp, darb-ı saht ile aʿzâsını leht leht ve Yergöğü Ağası'na dahi birkaç mahalden zahm-i mühlik açup, kadrini pest ve ırzını şikest eylediler.