Sadr-ı sâbık tevcîhât defterini tertîb ü imlâ ve merfûʿ-i südde-i serîr-i aʿlâ etmişidi. İnhilâl-i Sadâret-i ʿuzmâ takrîbi ile te'hîri enseb ve Sadr-ı cedîd tarafından tekrar ʿarz olunması mustasveb görülüp, binâʾen ʿalâ zâlik Serdâr-ı ekrem hazretleri Babadağı'na vusûllerinde defter-i tevcîhâtı iktizâsına göre tahrîr ve Rikâb-ı hümâyûn'a geldikde: “İzn-i hümâyûnum sâdır olmuşdur” ziyneti ile bâlâsı tevşîh ü tahbîr ve ordu-yi zaferbûya tesyîr olunmuşidi. Şevvâlin yirmi üçüncü günü tevcîhât vukūʿ bulup, menâsıb-ı ricâl ibkā ve fekat Çavuş-başılık Sadr-ı vakūrun taşrada kethudâları olan Kapucu-başı Rûhî Süleyman Ağa'ya ve Silahdâr [M2 143] Ağalığı selefi ʿArabgîrli İbrâhîm Bey'e ve Piyâde Mukābeleciliği Bekir Paşa-zâde ʿAtâʾullâh Bey'e ve Cebeciler Kitâbeti, Sırrı Selîm Efendi'ye tevcîh olunup, vüzerây-ı ʿizâm hazerâtının dahi mansıbları ibkā vü takrîr ve Adana Eyâleti menşûru fekat Râgıb Paşa dâmâdı Vezîr Hüseyin Paşa nâmına tahrîr olundu.