Özi Kalʿası'nın muhâfazası mûcibât-ı vakt ü hâlden olduğuna binâʾen, on iki bin nefere karîb yeniçeri serdengeçdileri tahrîr ve bayrakları küşâd ve üzerlerine birer münâsib ağa taʿyîn olunup, mühimmât ve masârıfları iʿdâd ve zemân-ı kalîlde ocak tarafından taʿyîn olunun mübâşirler ile tekmîl-i maslahat-i imdâd kılınmışidi. Zikr olunan neferâtın baʿzısı rü'yet-i levâzım nâmıyla Köstence ve Varna iskelelerine resîde ve müşâcere vü muhâsara vukūʿundan lerzân ve tersîde olarak, etrâfa perîşân olmağa şurûʿ eyledikleri sâmiʿa-güzâr-ı Serdâr-ı ekremî olmağla, o makūle usûl-i ʿahde muhâlif ve emr-i gazâ vü cihâddan mütecânif olanların teʾdîbât-ı lâzimeleri maʿrifet-i zâbitân ile icrâ olunarak sefînelerine irkâb ve me'mûr oldukları mahallere izhâb olundu. Aʿdây-ı dînin sevâhil-i Tunâ'nın ekseri mahallini zabt ve baʿzan berü câniblere mürûr ile sevâhil halkını mübtelây-ı teşvîş ü habt eyledikleri, mesmûʿ-ı Şâhâne olmak- dan nâşî defʿ-i gezend ve mümkin olursa karşu yakada medâr-ı tehassun olur bir mahalle rabt-ı peyvend kılınmak dâʿiyesiyle, on bin kadar yeniçeri dilâverlerini ihâta eder [M2 140] kırk kıtʿa sefâyin techîz ve Sünne Boğazı'ndan Tulça ve İsakçı'ya varup, kasdı mezbûrun îkāʿı zımnında sükkân-ı ʿazîmetleri tahrîk ü tehzîz olunmuşidi. Seksen beş senesi nisânında Karaharman sularında ʿarz-ı cemʿiyyet ü sevâd eyledikleri, maʿlûm-i Sadr-ı kaviyyü'l-fu'âd oldukda, on kıtʿası Prutça Boğazı'nın hıfzına meʾmûr ve bâkīsi Sünne Boğazı'ndan duhûl ile sevâhil-i Tuna'nın bir mahallini zabt etmek bâbında zâbitlerine hitâben emr-i ʿâlî şeref-sudûr oldu. Eflâk Voyvodası Manolaki derece-i mikneti kadar Bükreş Kasabası'nı muhâfaza ile aʿdâyı hudûda duhûlden menʿ ve ʿusât-ı reʿâyânın vahşetlerin defʿ kasdında olup, Eflâk Serʿaskeri Vezîr Mehmed Paşa tarafından iʿânet ü imdâdda zuhûr eden kusûr mesfûra sebeb-i futûr olduğundan başka, Devlet-i ʿaliyye'ye sıdk u istikāmetle hidmeti düşmen-i dîne dâg-ı derûn ve ahz ü taʿzîbini ızmâr ile îcâd-ı envâʿ-ı mekr u füsûn eylediklerini mesfûr derk ve zarûrî Eflâk tarafını terk edüp, Krayova'da ʿinân-keş ve bu hâl-i müşevveş ile o tarafda dahi ikāmet edemeyüp, Vidin Kalʿası'na dâhil olduğu semʿ-i tahkīka vâsıl ve düşmen dahi terk olunan mahalleri zabt ve iddihâr olunan zehâyir-i ehâyire mâlik ve bu cihetle dahi kuvvet peydâ edüp, râh-ı tecâvüze sâlik oldu. Aʿdâ-yı dînin berü yakada bir maʿkıl-i metîne dest-res olarak, etrâfa îsâl-i zarar derûn-i habâset-meşhûnlarında muzmar olduğuna binâʾen, Ada-i Kebîr'in muhâfazası lâzım ve top ve cebehânesine nazar olunarak asker ve sâyir cihetler ile takviyesi emr-i mühim olmağla, beş yüz kadar asker istishâb ve kalʿayı muhâfaza ve muhâreseye sarf-ı kudret u tâb eylemek şartıyla, Prizrin sükkânından Emrullah Ağa'ya iki tuğ ihsân ve cihât-ı sâyire ile tekmîl-i noksân kılınup, Vidin Kalʿası'nın dahi iktizâ eden mahalleri taʿmîr ve muhâfızı olan Vezîr Mehmed Paşa'ya on beş bin ve defterdârına on bin guruş irsâl olunup, muhâfaza-i kalʿa husûsu ber-vech-i teʾkîd tezkîr olundu. Mora Cezîresi'ni tesallut-i aʿdâdan masûn ve Cezîre'ye duhûl kasd edenleri dûrbâş-ı celâdet ile bîrûn eden Sadr-ı sâbık Muhsin-zâde Mehmed Paşa [M2 141] Vidin tarafına sevk-i asker ile meʾmûr ve Rikâb-ı kâm-yâbdan müşârun ileyhe ısdâr-ı menşûr kılındı. Taʿyîn-i meştâ emrinde vukūʿ bulan tereddüd iktizâsıyla, inkızây-ı şitâya dek fikr-i cemʿ-i zehâyir kulûb-i ekâbirde dâ'yir olmayup, Babadağı'na duhûlde zahîre cihetiyle zarûret çekileceği maʿlûm-i cenâb-ı Şehriyârî olmağla, Ordu-yi hümâyûn'a ve Özi Kalʿası'na vefâ edecek kadar zehâyir sevâhil-i Bahr-i siyâh'dan nakl olunduysa dahi, vaktiyle vusûl bulmadığından, Babadağı'nda kışlayanların râbıta-i taʿayyüşleri münfekk ve dûr u dırâz mahallerden zahîre celbi ile mâ-melekleri müstehlek oldu. İsâğası vazʿ-ı kadîm olan topların bu muhârebede istiʿmâlleri kayd-ı ʿazîm olduğu keyfiyyâtı mukaddemâ huzûr-i hümâyûna ʿarz u takdîm olup, ʿArabacı-başı Mehmed Ağa'nın bu fende fart-ı mehâreti hasebiyle ifâde-i hâl içün Âsitâne'ye irsâl olunmuşidi. Mûmâ ileyh Der-i devlet-medâr'a vazʿ-ı ruhsâr eyledikde, istiʿmâle selâhiyyeti olan topların resm ü hey'et ve siklet ü hıffetini şâmil Rikâb-ı hümâyûn'a ʿarz olunan takrîri istihsân olunup, zemân-ı yesîrde vech-i muʿarref üzere üç vukıyyeden yüz dirheme dek kifâyet mikdârı top isâğa vü tetmîm ve arabaları dahi yesîru'l-idâre ve sehlü'l-istiʿmâl olarak müceddeden inşâ ve tanzîm olunup, mühimmât ü levâzımâtıyla sefâyine tahmîl ve altmış kadarı berren Ordu-yi hümâyûn'a tesbîl olunmuşidi. Hübûb-ı bâd-ı kabûl ile Karaharman iskelesine vusûl bulduğu ihbâr olunup, derhâl ʿarabalar ile Ordu-yi hümâyûn'a nakl ve lâzım gelen mahallere tevzîʿ ve ʿArabacı-başı Ağa dahi berren getürdiği topları sekiz yüz güzîde nefer ile pîş-gâh-ı otâk-ı Sadr-ı ʿâlî-câhdan imrâr edüp, bu mukābelede hılʿat-i hâssu'l-hâs ile kadri terfîʿ olunup, on kıtʿa yüzer dirhemlik toplar dahi iki kāt barut ile lede'l-imtihân Sancağ-ı Şerîf obası mukābiline vazʿ u tertîb ve bâkīsi Topçu-başı tarafına teslîm olunmak tasvîb olundu. Vezâreti refʿ olunan Abaza Mehmed Paşa Köstendil'e gider iken Hân-ı ʿâlişâna tesadüf ve giriftâr olduğu musîbet sebebi ile izhâr-ı telehhüf edüp, müşârun ileyh dahi hâline te'essüf ile maʿan Ordu-yi hümâyûn'a getürüp, câme-i Vezâreti'ni tecdîd [M2 142] içün dâmen-gîr-i Sadr-ı cedîd olmuşidi. ʿUnfuvân-ı zemân-ı Hânî sebebi ile recâsı, hayyiz-i resân-ı isʿâf ve ibkā-yı Vezâret'i mâddesine Köstendil mansıbı irdâf olunarak mazhar-ı sunûf-ı eltâf olup, savb-ı maksûda ʿazîmet etmişiken, Kırım ülkesinde vâkiʿ Yeni Kalʿa'ya vüzerây-ı ʿizâmdan bir vezîr-i nâmdârın taʿyînini zarûriyyât-ı vakt îcâb eylediğine binâ'en, müşârun ileyhe beş bin guruş harçlık irsâl olunup, Köstence İskelesi'nden seksen kadar etbâʿ ile ol-savba şirâ-güşây-ı istiʿcâl oldu.