Rikâb-ı kâmyâba ifâde-i hâl maksadıyla irsâl olunan Mektûbî-yi Sadrıaʿzamî el-Hâc ʿAbdurrezzâk Efendi, birkaç defʿa huzûr-ı hümâyûna duhûl ile ruhsat-yâb-ı kıyâm u müsûl olup, asâkir-i İslâm'ın perîşânlığına dâ'yir olan ʿilel ü esbâbı âverde-i zebân ve düşmene galebe levâzımını yegân yegân bast ü beyân edüp, takrîri münakkah u müvecceh ve tedbîri müraccah ve gayr-i müşevveh olduğuna binâ'en, birkaç defʿa Bâb-ı ʿâlî'de [M2 138] ve bir defʿa huzûr-ı hümâyûnda tarh-ı kurʿa-i müşâvere ve kadh-ı zinâd müzâkere olunup, Efendi-yi mûmâ ileyh mecâlis-i mezkûrede: “Mîrîlü askere sarf olunan nukūd-i bî-şümâr telef-i sırf kabîlinden olduğu âşikâr ve o makūle serserî ve şiʿâr-ı gayretden berî olan eşhâs u erâzil, cümleden evvel firâr ile Devlet-i ʿaliyye'nin askerini mütezelzil etdikden sonra, yemîn ve yesârlarında buldukları emvâl ü eşyâyı gāret ve memleketlerine ʿavdet ve mezkûrlara olan rağbet, ocağlar halkına bâʿis-i fütûr u rehâvet olup, fî-mâ-baʿd Devlet-i ʿaliyye'nin muvazzaf askerine iʿtibâr ve kānûn-i kadîmlerine mürâcaʿat ile istihsâl-i vesâyil-i nizâmlarına sarf-ı iktidâr lâzım olduğunu tezkâr edüp, iʿmâl olunan topların dahi kiber ü irtifâʿından bahs ile istiʿmâli müteʿazzir ve nakl ü tahrîki müteʿassir olup, nev-îcâd toplar tedârükünü îmâ ve şimdîden meştâ askerini yerlü yerinden ihrâc ile Muʿasker-i hümâyûn'a takviyyet vermek iktizâ eylediğini sâyir mevâd ile ihsâ eyledi". Takrîr-i mezkûr zihn-i Şehinşâhî'de cilveger olan suver-i maʿkūlâta mütelâzim ve bu defʿa Ordu-yi hümâyûn tarafından vürûd eden tedbîrât ve tasarrufâtın me'âline mülâyim olup, Şehriyâr-ı enâm sevk-i kelâm-ı dürriyyü'n-nizâm ve şimdiye dek emvâl ü asâkir ve mühimmât ü zehâyirde katʿâ kusûr olunmadığını o meclisde olanlara mesned-i Hüsrevâneleri'ne lâyık ʿibârât-ı reşîka ile ifâde vü ifhâm buyurup, münâsib görüldüğü takdîrde askere kuvvet-i kalb olmak içün bizzât Edirne'ye ve yâhûd mahall-i tekābül-i aʿdâya devlet ü ikbâl ile hareket buyuracaklarını keşîde-i silk-i takrîr ve hâzır-ı bi'l-meclis olanların aʿsâb-ı hamiyyet ü gayretlerin tahrîk ile ocağlar zâbıtânı bu bâbda ifrâğ-ı cehd ü tâkat eyleyeceklerini rişte keş-i hüsn-i taʿbîr eylediler. Bundan sonra ocağların tanzîm-i şevârid-i umûrlarına ihtimâm ve tashîh be-dergâh ile teksîr-i neferâta ikdâm olunmak semtine sevk-i kelâm olunup, ocağlu bu bâbda dahi ser-fürû-bürde-i tavk-ı inkıyâd ve bu emr-i ehemmin tesviyesinde yek-sâk-ı ittihâd olacakların îrâd eyleyerek, fi'l-hakīka vâfir neferât tertîb ve berran ve bahran Ordu-yi hümâyûn'a tesrîb eylediler. Süvârî ocağlarında dahi bozma ve sâyir tasarrufât ile müstekinn olan fesâd dahi izâle olunup, [M2 139] kānunları üzere Livâʾ-i Şerîf muhâfazasında isbât-ı vücûd ve me'mûr oldukları cihâtda bezl-i mechûd etmeleri mezkûr olup, anlar dahi usûl-i kānûnlarına riʿâyet ve rezm-gâh-ı düşmende bezl-i tâkat eyleyeceklerini teʿahhüd ile meclis hitâm ve meşveret encâm bulup, bu vukūʿâtı Sadrıaʿzam ve Serdâr-ı ekrem'e ifâde ve ocağlar nizâmını mutazammın ve fî-mâ baʿd mahall-i rezm ü maʿrekede sebât ü istikrâra sebeb olacak efâʿîlin tedârük ve icrâsını mütebeyyin iki kıtʿa mufassal hatt-ı hümâyûn ile Efendi-yi mûmâ ileyh iʿâde olunup, ramazânın yirmi sekizinci günü Babadağı'na pâ-nihâde ve şevvâlin üçüncü günü ocağlu ve Anadolu'ya varınca ricâl-i devlet ʿakd olunan meclisde âmâde olup, zikr olunan iki kıtʿa hatt-ı hümâyûn cehren kırâʾet ve mefhûm-i şerîfi cümleye iʿlân ü işâʿat olunup, emr-i veliyyü'l-emr üzere emr-i cihâd ve teksîr-i cumûʿ u efrâd ve mukābele-i aʿdâ ve mukāraʿa vü gavgāda tesebbüt-i mühce vü fuʾâd ile ser ü cân fedâ eyleyeceklerinde yek-sâk u vifâk u ittihâd oldular.