Ordu-yi hümâyûn'un meştâya duhûlünden sonra tavâyif-i askerînin bir kıst mevâcibleri iʿtâ olunmasının lüzûmu bundan akdem ʿarz-ı serîr-i aʿlâ kılınmışidi. Binâberîn mevâcib ve sâyir metâlibe sarf olunmak içün iki bin dört yüz kîseye karîb meblağ Rikâb-ı hümâyûn tarafından tesyîr ve Bazarcık'da meştâ tahmînî takrîbî ile bir mahall-i me'mende hifz olunması Bazarcık'da kâ'in zâbitâna Ordu-yi hümâyûn tarafından mü'ekked tahrîr olunmuşidi. Ordu hazînesinde akça nefâd bulup, Özi mevâcibinin dahi bir ân akdem irsâli iktizâ eylediğinden, hazîne-i mezkûre dest-i emânet-kârân ile bâz ve dört yüz kîse ifrâz olunup, Özi serhaddine irsâl ve Dağıstanî ʿAli Paşa dahi bu akçanin bir mikdârıyla tanzîm-i hâl ve bâkīsi meştâya duhûl ʿakabinde Bazarcık'dan celb olunup, mevâcib nâmıyla ocağlara teslîm ve zâbitân dahi hevâyî taksîm ile meblağ-ı mezkûrun ekserîsini ihfâ vü tektîm eylediler. Bu akçaye müteʿâkib Şehriyâr-ı seniyyü'l-menâkıb bin kîselik zer-i kamer-tâb ile me'mûrların dest-i iktidarına kuvvet ü tâb verdi.