Nehr-i Tuna müncemid ve o deryâçe-i baʿîdu'l-gavr münʿakid olduğu takdîrde, düşmen üzerine çapul etmek üzere sevâhilin bir münâsib mahallinde meştâya Hân cenâblarının duhûlü tasmîm olunmuşidi. Ancak sevâhil asâkir-i İslâm ile mâl-â-mâl ve iktizâ eden taʿyînâtları etrâf kurâlarından istihsâl olunarak, me'mûrlar envâʿ-ı suʿûbete dûçâr oldukları zâhir-i hâl olup, Hân ise el-yevm sahrâda hıyâm ile ârâm ve sukūt-i berf ü bârân ile mübtelây-ı eskām olup, müdâvât ve nefsini ihtirâs içün Babadağı'nda bir hâne ihzârını iltimâs ve zîk-ı mekân hasebiyle kebîr ü sagīr bir mahal tedârükü mümteniʿ u ʿasîr olduğundan, Kethudâ Bey hânesinden hurûc ve Hân cenâbları vülûc etmek üzere sahrâda ikāmet ihtiyâr eylediğini Hân tafattun ve Babadağı'na iki sâʿat mesâfe olan Kanber Karyesi'nde bi'z-zarûre ihtiyâr-ı temekkün eyledi. Hân'ın o taraflarda kışlaması zehâyirin kıllet [M2 137] ü inkıtâʿını îcâb ve meclûbât-ı etrâf ancak dâyiresine ihâta ile sâyir mustahfızların idâre-i taʿyînâtları min asʿabi's-sıʿâb olacağı efkârıyla Sadr-ı vâlâ-cenâb dilhırâş-ı inkılâb olup, müşârun ileyhin beş altı yüz âdem ile mahall-i mezkûrda ikāmeti meştâ-nişîn olanlara külfet ve etrâfdan celb edecekleri me'kûlâtın bulunmamasına ʿillet olduğundan gayri, Âsitâne-i saʿâdet'de sarf u iʿtâ olunan altı yedi yüz kîse meblağdan mâʿadâ yevmiyye Ordu-yi hümâyûn hazînesinden yedişer kîse taʿyînât-behâ ile kesb-i râhat ü safâ edüp, Tuna'nın ʿadem-i incimâdı hasebiyle çapul gāyilesini dahi ber-taraf ve minvâl-i muharrer üzere mîrînin vâfir malını telef eyledi.