Bu defʿa Kırım Hân'ı nasb olunan Selîm Girây Hân ile Âsitâne-i saʿâdet'de birkaç defʿa ʿakd-i meclis olunup meştâ husûsu der-meyân ve hayli ebhâs güzerân ederek, taʿyîn-i meştâ Ordu-yi hümâyûn halkının re'yine tefvîz olunmak istihsân olunup, Hân dahi bu sene-i mübârekede Kırım'a ʿadem-i zihâb ile münâsib mahalde meştâ intihâb ve Tuna müncemid olursa vakt ü hâle nazaran karşuya geçmek ve yâhûd berü tarafları muhâfazaya ihtimâm etmek sûretleri istisvâb olunup, bu sûret ile Hân-ı müşârun ileyh Âsitâne'den hareket ve ramazân-ı şerîfin dokuzuncu günü mevkib-i hümâyûna gelüp, bu husûs içün nezd-i Serdâr-ı ekremî'de ʿakd-i encümen-i meşveret kılınup, ibtidâ serhadlerin keyfiyyetini Sadrıaʿzam su’âl ve Yeniçeri Ağası: “Ehl-yevm on beş bin kadar asker emr-i muhâfazada kıyâm eylediklerini” ifâde ile Defterdar Efendi dahi: “O mikdâr taʿyînât verdiğini” âverde-i zebân-ı makāl eyledi. Sadr-ı müşârun ileyh: “İttihâz-ı meştâya ne mahal münâsibdir?” deyü hitâb eyledikde, meştâ husûsu erbâb-ı hall ü ʿakd miyânelerinde yâ İstanbul yâhûd Edirne ve hiç olmadıysa Şumnu tarafları tahmîn olunmuşidi. Hân cenâbıyla kışlak husūsu Âsitâne'de karar ü sübût bulmuş ihtimâliyle herkes mühür-zen-i leb-i sükût olup, baʿde'l-ibrâm huzzârdan baʿzıları bu emri telmîh u işrâb ve Sadrıaʿzam dahi: “Vâkıʿā cenâbınız karîbu'l-ʿahdde Rikâb-ı hümâyûn tarafından iyâb ve bu husûs o tarafda ne vechile râbıta-bend-i nizâm oldu?” deyü isticvâb eyledikde, meştâ husûsu “Leyse'l-mücerreb misle men lem yuʿlem” mefhûmu üzere Muʿasker-i cihândârîde olanların re'yine ihâle olunduğunu îmâ eyledikde, herkes medhûş ve ʿavâkıb-i ahvâli fikr ile dem-beste ve hâmûş oldular. Bu sûretde mâdde meclis-i âhara teʼhîr ve: “Herkes yarınki gün ifrâğ-ı mâ-fî'z-zamîr ile ihzâr-ı tedbîr eylesün” deyü cümleye icâzet verilüp, haymelerine ‘avdet eylediler. Ferdâsı kemâ-kân ictimâʿ ile mecâl-i kelâma ittisâ verilüp, huzzâr-ı meclis ibtidây-ı emrde [M2 136] sevk-i kelâmdan imtinâʿ ve rîkların ibtilâʿ eylediler. Encâm-ı kâr baʿzıları Babadağı'nda meştânın mahzûrunu beyân ve Bazarcığ'ı istihsân edüp, Hân cenâblarının dahi Babdağı'nda kışlamasını tasrîh ve bu re'y müşârun ileyhi tekdîr ve tebrîh edüp, dâmen-efşân-ı infiʿâl ve behâne-cûy-i irtihâl olmuşiken, Sadrıaʿzam cevâba âgāz ve: “Bazarcık'da kışlandığı hâlde Babadağı ehâlîsi o sâʿat perîşân olacağlarını tahkīk u îkân ve bu keyfiyyet sâyir sevâhile sirâyet ile hey'et-i ictimâʿiyyelerine tefrika tareyân eyleyeceğini” beyân edüp, nihâyet-i kâr Babadağı'nda kışlamağa karar verilüp, ramazânın yirminci günü Serdâr-ı ekrem alay ile Babadağı'na duhûl ve sâyirleri dahi birer mahall-i münâsib tedârüküyle levâzım-ı şitâ tedârüküne meşgūl oldular. Vezîr el-Hâc Ahmed Paşa üç dört gün kadar Kāyim-makāmlık edüp, Sadrıaʿzam hazretlerinin şeref-endâz-ı kudûm oldukları sebebi ile me'mûriyyeti lağv olup, Tulça tarafına olan me'mûriyyet-i sâbıkasın tahvîl bâbında dâmen-i Âsafî'yi takbîl ve recâsı hayyiz-i isʿâfa tavsîl olunup, Silistire etrâfını muhâfazaya me'mûr ve birkaç günden sonra Niğbolu havâlîsinin muhâresesi dahi elzem görülüp, o tarafa ‘azîmet bâbında emr-i celîlü'l-ʿunvân şeref-sudûr oldu.