Sadrıaʿzam Kethudâsı olan es-Seyyid İbrâhîm Efendi ʿakl ü dirâyetle müştehir ve hidemât-ı devletde saʿy ü gayreti mütekâsir iken, bilâ-sebeb muzga-i efvâh-ı hasedkârân-ı cihân ve mevzûʿ-i bahs-i sebük-magzân-ı zemân olup, ʿazline irâde-i hümâyûn teʿalluk ve Âsitâne-i saʿâdet'den henüz vârid olan Ahmed ʿİzzet Efendi muntasıf-ı Şaʿbân-ı şerîfde ber-vech-i tekerrür Kethudâlık câh-ı bülendine tefavvuk edüp, selefi İbrâhîm Efendi zahîre mübâşirlerinin ahvâlini teftîş ü tenkīb ve maslahata nazaran o makūleleri tergîb ü terhîb ʿunvânıyla Silistire ve Ruscuk ve Şumnu taraflarına tesrîb ve mutlakā dilediği mahalde teneffüs ü ikāmet ile me'mûr ve bu sebeble vâreste-i endîşe-i dûrâ-dûr oldu.