Bâlâda beyân olunduğu vech üzere Hân cenâbları: “Kırım ülkesinin muhâfazası bin kîseye muhtâc ve kırk gün zarfında vürûd etmez ise Kırım'dan havf olunur" maʿnâlarını tahrîrâtına idrâc ve Serʿasker bulunan Silahdâr İbrâhîm Paşa dahi bu kavli tasdîk ile erkân-ı devlete bâʿis-i iztırâb u ihtilâc olmuşidi. Meblağ-ı mezkûrun cihet-i îsâli berr ü bahra mevkūf olup, berrin insidâd-ı cihâtı ve bahrın hatarât-ı âfâtı, bâʿis-i hayret-kâr-ı şinâsân-ı devlet olup, huzûr-ı hümâyûna duhûl saʿâdetiyle kesb-i imtiyâz eden Yenişehirli ʿOsmân Efendi'ye sudûr-ı hitâb ve: “Sen böyle teng vakitde güzel mülâhazalar eder idin bu müşkil mâddeye ʿilâc nedir?” deyü isticvâb buyurduklarında: “Bu mâdde işden midir?” deyerek, bilâ-teʾemmül kalem ü kâğıd taleb edüp: “Hân ve Vezîr-i müşârun ileyhimânın matlûbları [M2 132] olan meblağ Kefe cizyesinden havâle ile emri yazılmak” deyü, Rikâb Defterdârı'na hitâben buyuruldu ısdâr edüp, delâlet-i sühûlet, matlab-ı makrûn-ı tahsîn olarak inkişâf-ı derûna sebeb olmuşidi. Buyuruldu kaleme vardıkda: “On yedi kîse mahsûlü olan Kefe cizyesi Kalgay sultânlara harc-ı ceyb kaydolunduğu defterde mastûrdur” cevâbını ehl-i kalem tahrîr ve Şehriyâr-ı şefe- kat-âsâr bu vazʿ-ı nâdir berâbere zarûrî hande-nâk olarak mûmâ ileyhin ʿaklını tehcîn ve re'yini tevhîn ve ilcây-ı maslahatla Hân-ı müşârun ileyhin ʿazline karar verildiği, esahh-ı rivâyetle yâd-dâşt-ı erbâb-ı ihtibârdır; “Ve kad yekûnü maʿa'l-müstaʿcili'z-zilel”.