Yarlîğ-i fermây-ı hıtta-i Kırım olan Kaplan Girây Hân hatt-ı zâtında dilîr ü cesûr ve iʿmâl-i askere kādir bir merd-i gayûr olup, ancak hadâset-i sinn ve ʿunfüvân-ı şebâb ile tecribe-i umûrdan ʿâtıl ve keyd ü firîb-i düşmenden gāfil olduğuna binâʾen, birkaç defʿa Prut kenarında ve sâyir mahallerde rağdet-i gaflet ʿilleti ile münhezim ve beyne'n-nâs müstefîz olan sevret ve şânı münʿadim olup, Tatar tâyifesinin dahi düşmen ile muhârebesi vâkiʿ ve bir pâdişâh-ı kāhirin [M2 131] taht-ı tesallutunda makhûr olmakdan ise serbestlik imtiyâzını kesb ile bir kavm-i ser-âzâd olup, Hânlık ihtiyârı dahi re'y ü irâdelerine mufavvaz olmak muʿâhede-i hafiyyesi şâyiʿ olduğundan, bâzû-yı tasarruf u iktidârına bi'l-külliyye vehn ü fütûr ʿârız olup, Gölbaşı cenginde bu sebeb ile yerinde müstekarr ve gāyet-i emre muntazır ve perîşânlık vukūʿundan sonra İsmâʿîl'e ve andan birkaç âdem ile İsakçı'ya gelüp, Serdâr-ı ekrem ile baʿzı husûs müzâkeresinden sonra tekrar İsmâ'îl'e vürûdunda asker ile istimzâc ü sebât emâresini ʿadem-i ihsâs ile Kırım'a doğru ve ʿazm ü insırâfa muhtâc olup, lede'l-vüsûl Devlet-i ʿaliyye'ye irsâl-i peyâm ve mesârıfât-ı seferiyyesine medâr olmak içün bin kîse akça gönderilmediği hâlde Hânlığın âhara ihâle olunmasını ifhâm eylemişidi. Tahrîrâtı südde-i aʿlâya ʿarz olundukda, şimdiye dek müşârun ileyhe katʿî çok mebâliğ iʿtâ ve kâffe-i mes’ûlâtı kalem-i isʿâf ile imzâ olunup, farz-ı muhâl ile bu iltimâsına dahi müsâʿade derkâr olsa cüz’î ve küllî tarafından bir maslahat-ı nâfiʿa bürûz etmeyeceği delâlet-i ʿakl ile cezm ü tahkīk olunup, ʿazli tasmîm ve sâbıkā Kırım Hân'ı Selîm Girây Hân Rikâb-ı hümâyûn'a daʿvet olunup, o mesned-i refîʿ ile tekrîm ve müşârun ileyh dahi tarafında bulunan selâtîn-i Çengîziyye'yi istishâb ve mevkib-i hümâyûn tarafına ʿazm ü şitâb eyledi.