Silistire Muhâfızı Vezîr Abaza Mehmed Paşa, zâtında şecîʿ u dilâver ve kaviyyu'l-kalb ve nâmver olup, bi-takdîrillâhi Teʿâlâ vukūʿ bulan muhârebelerde sâyirleri gibi bu dahi ednâ bir hıdmete muvaffak olamayup, akrânının tebeʿâtı mestûr ve müşârun ileyh baht ü ârûn ve tâliʿ-i bâzgûn iktizâsıyla her cengde nakīsa-i inhizâm ile meşhûr olduğundan başka, cânib-i mîrîden şimdiye dek altı yüz kîse istıkrâz nâmıyla ihtitâf ve vefâdâr ʿadd ü şumâr etdiği evbâş-ı levendâta bezl ü itlâf ve bu mukābelede cüz'î ve küllî dîn ü devlete nâfiʿ bir maslahata zafer bulmadığını kendü dahi ikrâr ü iʿtirâf edüp, munhiyân-ı ahbâr vâsıtalarıyla bu ahvâl sâmiʿa-res-i Şehriyâr-ı ferhunde-hısâl olduğuna binâʿen, şeref-yâfte-i sudûr olan hatt-ı hümâyûn mûcebince işbu şaʿbânül-muʿazzamın sekizinci günü rütbe-i Vezâret'den tenzîl ve ʿalâ-tarîkı'n-nefy Köstendil Kasabası'na tesbîl olundu. Yeniçeri Ağası olan Vezîr Kapukıran Mehmed Paşa'nın İsmâʿîl vakʿasından sonra ne tarafa gitdiği mechûl ve râbıta-i ocak mağlûl olmamak içün Kul Kethudâsı Mehmed Ağa Yeniçeri Ağası nasb olunması nezd-i erbâb-ı şûrâda bir emr-i müstahsen ü maʿkūl görülüp, savâb-dîde-i erbâb-ı bîniş ü dîd ile Ağa-yı mûmâ ileyhin kadr u rifʿati mezîd kılınmışidi. Müteretteb-i ʿuhde-i kifâyeti olan umûrda butû-i hareketi ve o mesned-i refîʿa ʿadem-i liyâkati, sâmiʿa-res-i hazret-i Tâcdârî ve ʿazline irâde-i ʿaliyye cârî olup, mukaddemâ Kul Kethudâsı iken karşuya murûrdan evvel Kartal'da lede'l-iktizâ tehaffuz içün bir mahall-i menîʿ tedârük olunmasını telaffuz ile istirkāb ve Edirne Ağalığı'yla ʿazl ve izhâb olunan Süleyman Ağa'nın rüşdü reviyyeti bu defʿa [M2 130] Ordu-yi hümâyûn'a asker sevk u ihrâcında ser-zede-i sünûh olan kemâl-i gayreti mû-be-mû maʿlûm-i Hudâvend-i Aristo-mânend olmağla, Ağalık mesnedine isʿâd olunması mukaddemâ Sadrıaʿzam tarafına tenbîh ve mûmâ ileyh dahi sevk-i asker ederek Babadağı'na gelüp, ferdâsı Yeniçeri Ağalığı tevcîhiyle kadri tenvîh ve selefi Tekfurdağı'nda ikāmet ʿunvânıyla Ordu-yi hümâyûn'dan tebʿîd ü tenzîh olundu. Tuna'nın incimâdıyla gürûh-i eʿâdî berü taraflara medd-i eyâdî edeceği beyne'n-nâs şöhret-gîr ve Ordu-yi hümâyûn'un İstanbul ve yâhûd Edirne taraflarına ʿazîmeti hüsn-i tedbîr ʿadd olunup, Serdâr-ı ekrem bu hâle vâkıf ve meştâ keyfiyyetinde re'yi cümleye muhâlif olduğundan başka, Babadağı'ndan hareket Tuna'nın berü yakasında bulunan ehâlîye sebeb-i vahşet ve belki Edirne taraflarına ʿazîmet edeceklerine ʿillet olacağını mukaddemâ Rikâb-ı kâm-yâba îmâ vü işâret eyledikde, Hân-ı âlişânın Ordu-yi hümâyûn'a vusûlüne dek meştâ husûsu tevkīf ve bi'l-müzâkere taʿyîn-i mahal olunması Rikâb tarafından taʿrîf olunduğuna binâʾen, Babadağı Sahrâsı'nda kudûm-i Hân'a intizâr ile herkes mütereffil-i ridây-ı şekîb ü ıstıbâr olmuşidi. Ancak şiddet-i şitâ ve ʿadem-i tehassus-i meştâ, guft ü gûy-i nâsa sebeb ile bâʿis-i terk-i hürmet ü edeb olup, bu keyfiyyet Serdâr-ı ekrem hazretlerine münʿakis ve derhâl meşveret içün tertîb-sâz-ı meclis olup, ʿumûm-i nâs taʿyîn-i meştâ olunacağını cezm ü tahkīk ve ol vechile emânî vü ahlâmların tasdîk etmişler iken, Serdâr-ı ekrem Hân gelmedikçe meştâ taʿyîn olunmamak irâdesini iʿlân ve: “Herkes haymesinde söyleyeceğini meclisde beyân eylesün” deyü tahrîk-i zebân eyledikde, huzzâr pâ-bend-i efkâr ve darb-ı nutka ʿadem-i iktidâr ile inşâʾallâh karîben meştâ taʿyîn ve herkes râhat-güzîn olur” kavliyle ser-cünbân-ı hayret ve haymelerine ʿavdet eylediler.