İsakçı Sahrâsı'nda yedi mâh ikāmet ve bu müddet hilâlinde vukūʿ bulan keyfiyyet mahallerden bast ü işâret olunmuşidi. İnsidâd-ı etrâf ile zehâyire kıllet târî ve mevsim-i şitâ hulûlüyle haymelerde ikāmet sebeb-i zahmet ü zârî olup, meştâya ʿazîmet husûsu Ordu-yi hümâyûn'da tekellüme kādir baʿzı kimseler tarafından Serdâr-ı ekrem hazretlerine ifade olundukça, ikāmetde isrâr ve mukaddemâ Bazarcık'da kışlamak husûsiyçün Rikâb-ı hümâyûn'a refʿ etdiği ʿarîzanın cevabına intızâr üzere idi. Bu hengâm-ı ʿibret-encâmda İbrâ’îl vakʿası zuhûr ve fî-mâ baʿd İsakçı Sahrâsı'nda ikāmet müstevcib-i telef-i nüfûs ü sütûr olduğunu Sadr-ı vakūr teyakkun etmekle, o havâlinin umûrunu İsakçı Serʿaskeri Vezîr Dağıstânî ʿAli Paşa'ya sipâriş ve yüz bin guruş iʿtâsıyla müşârun ileyhi mazhar-ı lutf ü nevâziş edüp, mâh-ı şaʿbânın altıncı günü ittifâk-ı ârâ ile nakz-ı hıyâm ve bir gice beytûtet ile Babadağı Sahrâsı'na rekz-i aʿlâm olundu. Elli bir târîhi meştâsında Matbah Emîni Halîl Efendi maʿrifeti ile müceddeden binâ olunan dokuz ʿaded çeşmenin mürûr-ı aʿsâr ile vakfı [M2 129] muhtel ve tarîk-i cereyânı muʿattal olmuşidi. Serdar-ı ekrem hazretleri mukaddemâ Babadağı'nı teşrîf buyurduklarında, çeşmelerin keyfiyyeti tavsîf ve ʿimâra muhtâc olduğu taʿrîf olunmuşidi. Hazînelerinden on bin guruş ifrâz ve Defterhâne küttâbından Saʿdullah Efendi hıdmet-i taʿmîr ile mümtâz kılınmışidi. Mevkib-i hümâyûn ile Babadağı'na ʿavdetlerinde zikr olunan çeşmelerin kemâ fi's-sâbık binâsıyla suları icrâ olunduğunu, re'ye'l-ʿayn müşâhede ve bu eser-i hayrmâye ibtihâc ü beşâşetini ziyâde eyledi.