İbrâ'îl'de vukūʿ bulan fütûhât bundan akdem maʿrûz-i hâk-i ʿatebe-i Şehriyâr-ı bedîʿu's-sıfât kılınmış iken, iki üç gün sonra hudûs eden terk-i kalʿa keyfiyyetini terkīm, mûcib-i hicâb-ı ʿazîm olduğundan, efrâd-ı müteşahhısadan birinin Rikâb-ı hümâyûn'a ʿazîmeti ve iki seneden berü takdîr-i cenâb-ı İlâhî ile çekîlen taʿb ü meşakkati ifâde ile hazîne ve askere mess-i ihtiyâc eylediğini tafsîl etmek, Ordu-yi hümâyûn tarafından irâde olunmağla, Mektûbî-yi Sadrıaʿzamî olan el-Hâc ʿAbdurrezzâk Efendi talâkat-i lisân ve ʿuzûbet-i beyân ile mümtâz-ı etrâb ve bâ-husûs İbrâ'îl'in ve sâyir meʿârikin her keyfiyyetine müşâhadeten vukūf u ıttılâʿ kesb etmiş olup, vâkiʿ olan ahvâli yegân yegân şümürde-i benân-ı beyân etmek mekāsıdıyla Âsitâne-i saʿâdet'e irsâl olunmasını kârgüzârân-ı Ordu-yi hümâyûn istisvâb eyleyüp, fi'l-hâl mûmâ ileyh olsavb-ı şeref-evbe matıyye-rân-ı istiʿcâl olmuşidi. Birkaç sâʿatden sonra kalʿayı terk edenler ʿazz-ı benân-ı nedâmet ve ahadühümâ âhara gayret vererek Tuna'yı geçüp, kemâ-kân hifz-ı [M2 128] kalʿaya mübâşeret etmek üzere olduklarını ru'esây-ı asker tahrîr ü işâret etmeleriyle, bu haber-i gayr-i me'mûl vusûlünden derûn-i nâsda pertev-sürûr-i iltimâʿ ve der-ʿakab Efendi-yi mûmâ ileyh ircâʿ olunup, tasmîm-i evvel üzere Maçin'e ʿazîmet ve kalʿaya takviyyet vermek dâʿiyesi derûn-i Serdâr-ı ekremî'de cevelân ve ocağların ʿale't-tertîb hareketlerine sebk-i fermân edüp, Şaʿbanın üçüncü günü sukūt-i berf ü bârâna bakılmayarak, Yeniçeri ordusu Maçin'e şitâbân olmuşidi. Ordu-yi hümâyûn dahi harekete tehyi'e etmiş iken, feyâlet-i re'y-i ru'esâ ile tekrar askeri beyninde âteş-i ihtilâf iltihâb ve hâricde vücûd-i aʿdâ yoğiken, tekerrür-i hasr-ı kalʿa vehminden nâşî kasd u niyyetlerin fesh ile tekrâr Maçin tarafına geçdikleri haberi Sadrıaʿzamı dil-âzâr-ı ıztırâb edüp, düşmen dahi bu hâle vukūf ile kalʿaya duhûl ve bilâ-meşakkat bî-hadd mühimmât ü edevâtı be-resm-i hediyye âverde-i dest kabûl eyledi. Bu sûretde Efendi-yi mûmâ ileyhin haber- i evvel ile Âsitâne'ye tesyîri lâzım gelüp, mâh-ı mezbûrun beşinci günü Rikâb-ı hümâyûn cânibine ʿâzim oldu.