Bir kalʿada şedâyid-i muhâsara ile teng-dil olan ecnâd, neyl-i zafer ile ber-murâd olduklarında, der-ʿakab asker-i cedîd ile imdâd ve hîn-i muhâsarada zamîrlerinde cevelân eden terk-i kalʿa ve gaybet hülyâlarını envâʿ-i vaʿd ve bezl-i nakd ile izâle vü ibdâd lâzım olduğundan gayri, asker-i cedîde sebeb-i havf u haşyet ve ceng görmemişlerine bâʿis-i ruʿb-i vahşet olmamak içün pîrâmen-i kalʿada cây-gîr olan küşteleri hufralara ilkā ile nazardan ihfâ ve kalʿanın [M2 127] top darbından rahnedâr olan mahallerini bilâ-teʾhîr taʿmîr ve mühimmât-ı nâkısasını tekmîl ü tevfîr vacib olup, derûn-i kalʿada bulunan kāyid-i leşker dahi kaviyyü'l-kalb ve ʿâlî-himmet olup, dâyimâ fazl-ı cihâdı ve zaferden hâsıl olan imtiyâz u ecr-i meʿâdı beyân ederek, murâbıtların dâʿiye-i şevk u gayretlerin efzûn ve aʿdânın rücûʿuna magrem ü meftûn etmek fenn-i harbin furûʿâtından olduğunu erbâb-ı tedkīk tahkīk etmişlerdir. Ordu-yi hümâyûn'dan ve civârda vâkiʿ kazâlardan ve bâ-husûs Maçin'de müstekarr ʿAbdî Paşa dâ'iresinden kalʿaya birer mikdâr asker idhâl ve muhâsara görmüşlere istedikleri serhadden li-maslahatin esâmeler tahrîri, vesîle-i sebâtları olacağı agleb-i ihtimâl iken, bâlâda beyân olunan keyfiyyâtın icrâsına himmet olunmadığından fazla askerin hılâf-ı matlûbu olan serhadlere esâmeleri tahrîr ve hıtâm-ı maslahatda terk-i hıdmet nâmıyla refʿ u ilgā hâtıralarını kalblerine ilkā ile tevhîş ü tenfîr ve şu kadar top ve mühimmât ile kalʿayı terk ve irtikâb-ı tehâvün ü taksîr etmelerine ʿillet olarak, âyine-i gîtî-nümâdan sâf olan tabʿ-ı şegâf-ı Şâhâneyi tekdîr eylediler.