Kalʿa-i mezkûre düşmen tesallutundan halâs ve ehl-i İslâm fevz ü zafer ile ihtisâs bulup, Ordu-yi hümâyûn'un İsakçı Sahrâsı'nda ikāmeti altı yedi mâha resîde ve tûl-i meks ü ikāmetle sahrâ-nişîn olanların kabây-ı sabr u tâkatleri derîde olup, Dağıstânî ʿAlî Paşa'nın İsakçı'ya vürûdundan sonra fekk-i hıyâm ve meştâ tarafına şedd-i hirâm-ı ârâm olunacağı hâss u ʿâmm miyânında karar-gîr-i nizâm olmuşidi. Recebü'l-ferdin yirmi dördüncü salı günü müşârun ileyh İbrâ'îl tarafından ʿavdet ve iki bin kadar askerini otâk-ı Serdâr-ı ekremî pîşgâhından imrâr ile ʿarz-ı debdebe vü heybet edüp, vech-i musammem üzere Ordu-yi hümâyûn'un hareketi esbâbına teşebbüs olunmuş iken, İbrâ'îl Kalası'nda mevcûd cünûd miyânına ihtilâl vâkiʿ ve zabt u rabtları mümteniʿ olup, düşmen dahi kurb ü civârda mütemekkin ve üç dört gün zarfında on iki bin asker gönderilmediği takdirde bir bâdire zuhûru müteʿayyen olduğunu Muhâfız Vezîr Sâdık Paşa ve sâyir ru'esâ tahrîr ü imlâ etmişleridi. Mevcûd Ordu-yi hümâyûn üç bin neferden efzûn olmadığı derece-i sıhhate makrûn ve anların dahi baʿzısı kisb ü kâra meftûn olmalarıyla, meştâ tertîbâtından o tarafa irsâl-i asker olunur deyü haber gönderildikden sonra bir meclis-i hâfil ʿakd olunup: “Bu emr-i düşvâra çâre nedir?” denildikde, huzzâr-ı meclisin kimi tenahnuh ile tathîr-i gelû ve kimi beht ü sükût ile [M2 126] tâfte-rû olup, âhıru'l-emr Yeniçeri Ocağı Maçin'e ʿazîmet ve beyne'l-ehâlî vâkiʿ olan ihtilâli refʿ ile defʿ-i vahşet etmek ve o tarafda olan asker derdest bulunup, hâricden dahi taʿyîn-i neferâta ihtimâm olunmak reʾyine nizâm ve meclise hitâm verildi. Yeniçeri zâbitleri haymelerine vardıklarında, defʿ-i ihtilâl endîşe-i muhâl kabîlinden olduğunu miyânelerinde tezkâr ve intifây-ı nefʿ-i hareketle bast-ı aʿzâr eylediler. Fi'l-hakīka baʿzı sâde-dilân-ı rüzgâr Ocâğ-ı ʿâmirenin Ordu-yi hümâyûn'dan infikâkı metrûk olduğunu tekavvul ve bu keyfiyyete binâʾen, tekrar ʿakd-ı meclis olunup, refʿ-i ihtilâl kazıyyesi teemmül olundu. Niçe kīl u kāldan sonra Livâ-i şerîf-i saʿâdet-redîf ile o tarafa teveccüh beyne'l-havâss tefevvüh olunup, bu re'yi herkes tasvîb ve ocağların kānûn üzere evvelâ hareketleri tertîb ve baʿdehû Ordu-yi hümâyûn taʿkīb etmek hilâlinde İbrâʾîl'de mütehaşşid-i cünûd henüz hendek ve şeranpo aralarında mevcûd olan aʿdâ lâşelerinin tathîr olunmadığını ve nân-pâreleri ber-vefk-i matlûb meclûbları olmayup, hılâf-ı semt olan Sinop ve ana mümâsil mahallere masrûf olup, bâ-husûs baʿzı kimseler inʿâmât-ı firâvân ile memnûn ve bazıları cihât-ı imtiyâziyyeden bir şey'e nâyil olmamağla, mükedder u mahzûn olduklarını takrîr ile ihdâs-ı şerr u şûr ve düşmenin kurbiyyeti sebebinden neş'et eden maglatalarını bu aʿzâr-ı gayr-i vâride ile mestûr ve encâm-ı kâr kalʿayı bırakup, cümlesi Maçin tarafına ʿubûr etdikden sonra dâyimâ kalʿa ahvâline nâzır olan düşmen-i gādir bî-kedd ü taʿb kalʿaya duhûl ile dest-zen-i şevk u tarab oldu. Bu takdîrde Ordu-yi hümâyûn'un Maçin tarafına hareketi bî-fâyide ve âhar vechile ʿilâcına bakılmak irâde olundu.