Mahsûrların bu gûne ikdâm ü cür'etine Efendi-yi mûmâ ileyhin hass ü igrâsı ve pey-der-pey asker imrârıyla bezl-i mâl ve îsâl-i nevâl eylemesi ʿillet-i akvâ olup, bu keyfiyyet maʿlûm-i Sadr-ı-vâlâ menkabet oldukda, mûmâ ileyhi tatyîb ve fî-mâ baʿd o makūle hıdmete tergīb içün bin ʿaded altun ve mûsâ-kârî bir tîgān irsâliyle mazhar-ı pâdâş u tesvîb eylediler. Kalʿa muhâfızdan hâlî ve bir vezîrin taʿyîn olunması mukaddemâ matlûb-i ehâlî olup, mîr-î mîrândan ʿAlâ’iyyeli Sâdık Paşa el-yevm muhâfaza-i kalʿada mevcûd ve Vezâret'e liyâkati meşhûd olduğunu Vezîr ʿAbdî Paşa tahrîr ü işʿâr ve fi'l-hâl mûmâ ileyhe Vezâret verilüp, emr-i muhâfazaya kıyâm eylemesi bâbında emr-i ʿâlî ısdâr ve beş bin guruş harclık tesyâr olunup, İşbozlu ʿAbdullah Paşa dahi kalʿada iʿmâl-i asker ile fedây-ı cân ü ser etmek üzere olup, mûmâ ileyhin dahi cihete'm-mâ ile memnûniyyeti müvecceh ve münâsib görülüp, mutasarrıf olduğu Karahisâr-ı sâhib Sancağı'na ilhâkan Sultan-önü Sancağı tevcîh ve hâli terfîh olundu. Kalʿa-i mezbûrede Yeniçeri zabıtı olan Süleyman Ağa'nın Seksonculuk Pâyesi'yle kadri efzûn ve iki bin guruş ʿatıyye ile merkūm memnûn kılınup, zahîre mübâşiriyyeti ile Silistire'de mütemekkin Maldovancı ʿAli Paşa [M2 123] Kethudâsı Hasan Ağa dahi Mîr-î mîrânlık ile be-kâm ve Teke Sancağı'yla makziyyu'l-merâm olup, tedârük edebildiği asker ile Dağıstânî ʿAli Paşa maʿiyyetine varup, andan karşu cânibe mürûr eylemesi bâbında emr-i ʿâlî sudûr ve fi'l-hakīka müşârun ileyh ve Mîr-î mîrân-ı mûmâ ileyh asker-i bî-şümâr ile şehr-i recebin on üçüncü günü Hırsova maʿberinden geçüp, İbrâ'îl cânibine doğru ʿinân-tâb ve kahr-ı aʿdâya râyet-efrâz-ı ʿazm ü şitâb oldular.