Moskovlu Tuna'nın öte yakasında vâkiʿ kılâʿ u bikāʿın ekserini bilâ-tekellüf ahz u tasarruf ve bu hâle te'ellüf ile İbrâ'îl Kalası'nı teshîre dahi izhâr-ı nahvet ü tasalluf edüp Kiyov (كيوو) ve Podgorican nâmında iki cenerale vâfir kâfir koşup Nehr-i Prut'dan imrâr ve Fokşan Kasabası'ndan güzâr ile cumâdelâhirenin on altıncı günü -ki eylülün yirmi beşinci günü idi- kalʿa-i mezbûreyi muhâsaraya ibtidâr eylediler. Ferdâsı yürüyüş sûretinde düşmen kalʿa üzerine hücûm edüp, muhâfız bulunan Canikli Vezîr Süleyman Paşa mukaddemce ihzâr eylediği cünûd-i muvahhidîni dervâze-i kalʿadan ihrâc ve düşmeni her tarafdan [M2 120] izʿâc ile yetmiş kadar kelle ve on iki nefer zinde ahz ve aʿdâyı ʿavdet-i kasrîye muhtâc eylediler. Tarrâka-i raʿda hem-âheng olan sadây-ı top, Ordu-yı hümâyûn tarafından istimâʿ ve İbrâ'îl'in mahsûriyyetine kesb-i ıttılâʿ olunup, ahvâl-i kalʿaya vukūf ve vâkiʿ olan ahvâli iʿlâm içün fart-ı istikāmetle maʿrûf bir kimsenin me'mûriyyetini hayr-hâhân-ı devlet tahsîn ve Sadrıaʿzam Mektûbçusu olan ʿAbdurrezzâk Efendi bu hatb-ı ehemme taʿyîn olunup, istihkâm-ı kalʿaya dâ'ir umûrun temşiyetine ikdâm ü gayret eylemesi, kûze-i dirâyetine tevdîʿ ile dâ'ire-i me'mûriyyeti tevsîʿ olunup, mûmâ ileyh dahi İsakçı'dan hareket ve me'mûr olduğu cânibe ʿazîmet eylemişidi. Aʿdâ tarafından ahz olunan dil ü kelle Muhâfız Paşa'nın oğlu Mehmed Bey ile Ordu-yı hümâyûn'a vürûd ve kalʿanın su kapusundan gayri cemîʿ-i ebvâbı mesdûd olup, el-yevm muhâsaradan zahmet-keş ve halleri katʿâ müşevveş olmayup, düşmen ber-geşte vü zebûn ve ehl-i İslâm gûn be-gûn nasr-ı ʿazîze makrûn olduğunu müşârun ileyh tahrîr ve ordu halkını tebşîr edüp, dillerden Moskovlu olanlar der-zencîr ve reʿâyâdan bulunanlar seyf-i siyâsetle tedmîr olunup, mîr-i mûmâ ileyh taraf-ı Serdâr-ı ekremî'den me'mûlü derecesinde ikrâm olundukdan sonra pederi tarafına ʿatf-ı zimâm eyledi. Kalʿa-i mezkûreye imdâd ü iʿânet, erbâb-ı cihâda vâcib ve bu bâbda Sadr-ı sütûde-menâkıb leyl ü nehâr bu husûsa mükib olup, İsakçı Serʿaskeri Dağıstânî ʿAli Paşa askerinden ve sâyir ocağlardan bir mikdâr âdem tedârük ve berren ve nehren İbrâ'îl'e irsâl ve o vakte dek Mektûbî Efendi dahi Maçin'e varup, Maçin Muhâfızı Vezîr ʿAbdî Paşa ile vürûd eden askeri kalʿaya îsâl eylediler. Aʿdâ kalʿaya rûz-be-rûz takviye ve istihkâm verildiğini müşâhade ve bir buçuk sâʿat kalʿadan mübâʿade ile bir şeb-i târda top altına girmek kasdını mülâhaza eylediği maʿlûm-ı erbâb-ı muhâfaza olmağla, hatar-nâk olan mahaller hücûmlarından hirâset ve tekarrub kasd ettiklerinde top ve humbara ve sâyir sanâyiʿ-i nâriyye iʿmâline mübâşeret olunarak, pîrâmen-i kalʿadan müstebʿid ve bâb-ı maksadları her tarafdan münsed olduğunu muʿayene ile mahallerinde [M2 121] pâ-bercây-ı ârâm ve bu hâl birkaç gün ber-devâm olup, keyfiyyet-i hareketleri enzâr-ı guzâtdan nihân ve fî-mâ baʿd ne makūle evzâʿ ihtirâʿ eyleyeceklerinin mechûliyyeti, bâʿis-i teşettüt-i zann ü gümân olup, mâh-ı mezkûrun yirmi beşinci günü kalʿada olan âlât-ı nâriyyeyi âmâde edüp, kalʿa kapusunu küşâde ve düşmen meterislerine hücûm ile vâfir kâfiri hâviye-i sakara üftâde eyledikden sonra yine kalʿaya rücûʿ ve emr-i muhâfazaya şurûʿ eylediler. Düşmen-i dîn ehl-i İslâm'ın ʿavdetini inhizâma haml ile taʿkīb ve top menziline karîb geldikde, tasmîm olunduğu vech üzere toplara âteş verülüp, bir mikdârı refîk-i dûzahiyân ve bâkīsi meterislerine gürîzân oldular. Mezbûrların her hücûmda me'yûs oldukları bi'l-istihbâr Merşal tarafından mahsûs olmağla, Kartal'da kâyin ordusundan kifâyet mikdârı asker ifrâz u tesyîr ve istihlâs-ı kalʿa husûsunu zikr olunan cenerallere ber-vech-i te’kîd sipâriş ve tahrîr eyledi. Mezbûrlar İbrâ’îl havâlîsine vürûdlarında Muhâfız Paşa mâh-ı mezkûrun yirmi sekizinci günü bi-takdîrillâhi Teâlâ mat'ûn ve dağdağa-i dünyadan râhât-yâb-ı sükûn olup, kalʿada olan ru'esâ, keyfiyyeti Maçin'de mukīm Vezîr ʿAbdî Paşa'ya inhâ ve ol dahi Ordu-yi hümâyûn'a ihbâr u inbâ ve Mektûbî Efendi dahi kāyimesinde, ʿAbdî Paşa ile bi'l-ittihâd İbrâ'îl'e tâze imdâd irsâliyle kalʿa ehâlisine bâʿis-i kuvvet-i fu'âd olduğundan gayri Maçin-burunu ve mahâll-i sâyireye inşâsı ehemm olan tabyaların binâsına mübâşeret ve top vazʿıyla İbrâ'îl'in Su-kapusu tarafını muhâfazaya bezl-i cell-i gayret eylediklerini îmâ ve ʿAbdî Paşa muhâfız nasb olunur ise mâl-ı firâvân sarfıyla Maçin'de ictimâʿ eden asker perâkende vü perîşân olacağlarından başka, asker imrârı ve tabya inşâsı kendüsüne münhasır olup, iki cesîm maslahatı şahs-ı vâhid idâreye kudret-yâb olmayup, ahad-i emreynin iltizâmı dahi emr-i dîgerin taʿtîlini îcâb edeceği bî-irtiyâb olup, ʿAbdî Paşa kemâ-kân Maçin'de ibkā ve bir gayri muhâfız tedârükü her vechile evlâ olduğunu mukaddimât-ı masnûʿa ile temhîd ve ordu halkı dahi inhâsını [M2 122] tasdîk u te’yîd edüp, etrâfda olan vüzerâ birer şugl ile me'mûr ve mahallerinden tahrîk, müstelzim-i mahzûr olduğundan, İsakçı Serʿaskeri ʿAli Paşa Hırsova'dan mürûr ve mahsûrlara hâricden iʿânete bezl-i makdûr etmek üzere ısdâr-ı menşûr kılınup, müşârun ileyh iki bin kadar âdem ile o tarafa sevk-i sütûr eyledi. Düşmen-i fitne-engîz kalʿanın her tarafında işʿâl-i nâyire-i ceng ü sitîz ve su kapusun zabt ve şeranpolarda olan piyâdegânı refʿ u tebʿîde cehd ü takātını ifrâğ ve asker-i İslâm ise her tarafa gereği gibi metânet verüp, ne cânibe düşmen teveccüh etdiyse, o cânibden mezbûrlara peyâm-ı merg iblâğ ederler idi. Su kapusu Maçin'de müceddeden inşâ olunan tabyaya muhâzî olmağla, o tarafdan dahi dâne-i top ile vâfir müşrik hâlik olarak silsile-i emânîleri güsiste ve kemâ fi'l-evvel karar-gâhları olan mahalde nişeste oldular.