Nehr-i Tuna'nın berü taraflarına bir takrîb mürûr ile ehl-i İslâm'ı âvâre-i huzûr etmek hasm-ı bergeşte-i ahvâle ecell-i meʾârib olduğu zihne mütekārib olduğundan, sevâhil-i İslâmiyye'yi muhâfaza vâcib olmağla, binâ-berîn Rumeli Vâlîsi Vezîr ʿAbdî Paşa bundan akdem İsakçı Serʿaskerliği'ne intihâb ü intikā olunup, şimdiye dek mülâzemet-i Ordu-yi hümâyûn ile visâde-i râhata ittikâ etmişidi. Dağıstânî ʿAli Paşa'nın vürûdu Serʿaskerlik niyyetini ilgā ve müşârun ileyhin bir tarafa me'mûriyyetini ilcâ eylediğine binâʾen, ʿAbdî Paşa Maçin muhâfazasına ve İç-il Mutasarrıfı Vezîr Abaza Paşa Hırsova tarafına taʿyîn ü irsâl ve onar bin guruş karzen taraflarına iʿtâ olunup, me'mûr oldukları mahallere teveccüh ü ʿazîmetleri istiʿcâl olundu. Müşârun ileyhimâ gāret-zede-i aʿdâ ve tabl ü surnâ ve ʿunvân-ı Vezâret'den muʿarrâ ellişer altmışar etbâʿ ile reh-peymâ oldular. Tefâsîl-i ahvâli bundan akdem bast u ifâde ve el-yevm Silistire'de ikāmeti irâde olunan Vezîr Sârım İbrâhîm Paşa'yı mübtelâ olduğu ʿillet-i merâk-ı ihtinâk ve evâsıt-ı Cumâdelâhıre'da hükmü irâde-i hazret-i Hallâk mâh-ı serîʿus-seyr ʿömrünü giriftâr-ı ʿukde-i mehâk edüp, mutasarrıf olduğu Sivas [M2 111] Eyâleti, Özi Muhâfızı ve Silistire Vâlîsi Vezîr Hazînedâr ʿAli Paşa'ya ve Silistire Eyâleti, İsakçı Serʿaskeri Vezîr Dağıstânî ʿAli Paşa'ya tevcîh ve bu vechile halleri terfîh olundu. Müteveffâ-yı müşârun ileyh bir defʿa Rikâb Defterdârı olan ʿAcem Kılıcı Mustafa Efendi'nin necl-i necâbet-güsteri ve Defterdâr-ı nâmdâr olan Behcet Efendi'nin birâder-i vâlâ-güheri olup, Maliyye Kalemi'nden neş'et ile âzmâyiş-i maʿrifet ve tahsîl-i meleke-i kitâbet edüp, hakkında nazm: “Babası seyf-i ʿacemdir anası gaddâre Tîgān huyludur, ʿuşşâka cefâlar kılıcı” beyt-i meşhûrunu ehâcî vü mücûne mâyil ʿasrın baʿzı kavâbili terâne-sâz-ı terkîb ve sirran miyânelerinde inşâd ü teşbîb ile müstehakk-ı levm ü te'nîb olmuşlar idi. Tayy-ı ʿakabât-ı tarîk ile seksen senesi Tersâne Emîni iken ʿAvnî Efendi yerine Defterdâr-ı sâhib-i iştihâr ve melhûz-i nazar-ı Şehriyâr-ı İskender iʿtibâr olup, Devlet-i ʿaliyye'de ser-nümâ-yı zuhûr olan müstevfîlerin eşiddâsından ve fenn-i defterîye vukūf-i tâmm tahsîl etmiş ketebenin akviyâsından olup, defterdarlığında kaʿr-ı deryâya rüsûb etmiş emvâl-i mîrîyi gavvâs-ı ʿakl-ı dûr-endîşiyle tahsîl ve Âsitâne'de ve taşrada niçe erbâb taʿyîn ü iştihârı şiddet-i takāzâ ile kavlen ve fiʿlen terzîl etmişidi. Vezâreti halinde li-emrin mâ-sadara bî-hemtâdan müsteşʿir olup, ednâ bir maslahata hod be-hod mübâşeretden ictinâb ve devlete nâfiʿ bir hıdmete muvaffak olmadığı maʿlûm-i erbâb-ı elbâbdır. Müşârun ileyh tüvân-gerân-ı zemâneden olup, iddihâr etdiği emvâl, matlaʿ-i Vezâret'inden maktaʿ-i vefâtına dek bîhûde yere sarf ü ibzâl ve ne vârislerine ve ne Beytülmâl'e fâʾide etmediği zâhir-i hâldir. Kable'l-vezâre mutasarrıf olduğu menâsıb ve dahi sonra Ruscuk'da vukūʿ bulan menâkıb, mahallerinde mukayyed ü mastûr ve tekrarı sebeb-i se'âmet-i erbâb-ı şuʿûr olduğundan, bu mikdâr ile iktifâ ve: “Hayru'l-kelâmi mâ kalle ve delle" mesleğine i'tisâ olundu.