Bâlâda ifade olunduğu vech üzere, otuz bin kadar asker bî-pâ vü ser Akkerman ve Özi taraflarında vâleh ü hayrân pûyân olup, o makūleleri cemʿ ve aʿdâ tasarrufuna dâhil olmayan [M2 109] memâliki muhafaza ile hasbe'l-makdûr zarar-ı düşmeni defʿ etmek makāsıdıyla, Bucak taraflarında bulunanlardan bir şahs-ı müteʿayyine Vezâret verilüp, askere Başbuğ nasb olunması erkân-ı saltanat ve ehl-i meşveret sevk u îrâd etmişler idi. Dergâh-ı âlî Kapucu-başılarından İsakçı Anbar Emîni Dağıstânî ʿAli Ağa, vâkiʿ olan maʿrekelerde izhâr-ı celâdet ve bâ-husûs İsmâʿîl vakʿasında vüzerâ vü ru’esâ kenâre-gîr-i selâmet olduklarında, mûmâ ileyh o havâlîde ikāmet ve müdâfaʿa-i aʿdâya mübâderet eylediği menkūl ve hakkında her tarafdan hüsn-i şehâdet, semʿ-i Serdâr-ı ekremî'ye mevsûl kılınup, bâlâda beyân olunan garaz u hikmete binâʾen, rütbe-i vâlâ-yı Vezâret'le kadri iʿlâ ve menşûr-i Vezâret etbâʿ-ı Sadriaʿzamî'den biriyle karşu tarafa isrâ olunmuşidi. Düşmen tarafından insidâd-ı meʿâbir zâhir olduğundan, resânende-i menşûr-i Vezâret gerüye ʿavdet ve ifâde-i keyfiyyet eyleyüp, bu sûretde kasd-ı mezkûr bi't-tabʿ mülgā ve mevkūf-i meşiyyet ve hükm-i cenâb-ı Hudâ olmuşidi. Ağa-yı mûmâ ileyh ise, hakkında muzmer olan ʿinâyetden bî-haber ve o havâlîde olan asker-i güm-kerde râha rehber olarak Özi'ye vürûd ve aʿdâ ile câ-be-câ muhârebe ederek, asker-i mezkûr nâ-çâr atlarını bırakup, Özi'ye ve Akkerman taraflarında mevcûd olan sefâyine rükûb ve birer tarafa vüsûb eyleyüp, o aralıkda Ağa Paşa dahi kenâr-ı selâmete vâsıl ve Ordu-yi hümâyûn'a dâhil olup, Ağa-yı mûmâ ileyh bir zemân dahi o havâlîde geşt ü güzâr ve âhıru'l-emr bir sefîneye süvâr ve Varna İskelesi'ne resîde ve andan sonra Ordu-yi hümâyûn'da 'inân-keşîde oldu. Düşmen Kartal Sahrâsı'nda hayme-nişîn ve berü tarafa sû-i kasd niyyeti ile der-kemîn olduğundan başka, Ordu-yi hümâyûn halkı meştâ tarafına 'akd-ı niyyet ve İsakçı'yı muhâfaza ve bâ-husûs anbarları muhârese içün Serdâr-ı ekrem bir vezîr taʿyînine ʿazîmet edüp, rütbe-i Vezâret ʿan-asl mûmâ ileyhe musammem olduğundan, işbu cumâdelûlâ evâhırında rütbe-i vâlâ-yı Vezâret'le kadri terfîʿ ve İsakçı Serʿaskerliği'yle ʿunvân-ı menşûr-i Vezâret'i tevkīʿ olundu.