Hasm-ı bed-mâl Kili ve İsmâʿîl'i kabza-i tasarrufa idhâl ve Bender Kalʿası'na dahi vâfir asker irsâl edüp, tavâyif-i Tatar'ın mütemekkin oldukları Bucak erâzîsi memerr-i gürûh-ı aʿdâ ve insilâb-ı kudret-i müdâfaʿa ile baʿd-ezîn o taraflarda ikāmetleri muhâtarayı müstelzim bir maʿnâ olduğundan gayri, bâlâda îmâ olunduğu vech üzere Yedisan Kabîlesi ʿan-asl Moskovlu'dan müntezaʿ ve bir müddetden berü miyânelerinde muhâbere-i yek-ciheti ve muvâfakat gayr-i munkatıʿ olup, himâyet-i aʿdâ ile mekânlarında istikrâra karar verdikleri şâyiʿ ve bu hâle Hân ve sâyirleri muttaliʿ olmağla, bu keyfiyyet sâyir kabâyile sirâyet etmemek içün Hân-ı ʿâlîşân mutâviʿ olan kabâyili alup, Akkerman'a doğru râciʿ olmuşidi. Kabâyil-i mezkûrenin bir mikdârı Akkerman'a dahil ve bâkīsi müşârun ileyh ile Özi'ye doğru râhil olup, düşmen Bucak taraflarının Tatar ve sâyir askerden hâlî kaldığını istimâʿ ve altı bin kadar hazele ile Özi Kalʿası etrafında ictimâʿ edüp, bu keyfiyyet Hân'ın o taraflara vürûdu vaktine tesâdüf edüp, maʿiyyet-i Hânî'lerinde olan asker ile mukābeleye ikdâm ve tarafeynden müdâvele-i rumh u hüsâm ve aʿdânın vâfiri iʿdâm olunup, bâkīsi reh-gîr-i vâdî-yi inhizâm oldu. Birkaç [M2 107] günden sonra düşmen-i li'âm cemʿiyyet-i kesîfesine nizâm verüp, Özi'ye doğru tekrar hücûm eyleyeceği maʿlûm olduğuna binâʾen, Hân cenâbları Özi'den üç kıtʿa top ve üç yüz mikdârı piyâde ihrâc ve Kartal ve İsmâʿîl firârîlerini bu cemʿiyyete idrâc edüp, aʿdâ ile mukābil ve hamle-i ûlâda sevret-i düşmen zâyil olup, geldikleri mahalle ʿazm ü şitâb ve bu tavr-ı garîb İslâm'ı mazhar-ı kuvvet ü tâb edüp, kasd-ı taʿkīb ile hecme-endâz-ı sûy-i düşmen ve nâ-gâh kemîn-gâhdan bir gürûh-i âhen-pûş meşhûd-i erbâb-ı tîg u cevşen olup, firârîler dahi ʿavdet ve ehl-i İslâm'ı iki tarafdan hasr u tazyîka mübâderet eyleyüp, ne hâl ise mahall-i maʿrekeden rû-tâb ve bir mikdârı esîr ve bakıyyesi kalʿaya duhûl ile vâreste-i kayd-ı ıztırâb oldular. Bundan sonra Hân, Kırım tarafına güzâr ve maʿiyyetinde olan asâkirin bir mikdârı maʿan Kırım'a ve bir mikdârı Donanma-yı hümâyûn gemilerine girüp, zuʿafây-ı askerin bir mikdârı dahi bi'z-zarûre Özi Kalʿası'nda ikāmet ihtiyâr eyledi.