İskenderiyyeli Mehmed Paşa-zâde Mîr-i mîrân Mustafa Paşa ve Humbaracı ve Lağımcı-başı ve Rumeli'nin sağ ve sol alaybeyleri iki bin kadar âdem ile İsmâʿîl vakʿasında Kili'ye doğru ʿazîmet ve ehâlînin ekserîsi Eski Kili ve Akkermân taraflarına hicret etmiş bulunmalarıyla, Mîr-i mîrân-ı mûmâ ileyh mezbûrlar ile bizzât hıfz-ı kalʿaya mübâderet ve nüfûzuna ʿillet ve bâzû-yı iktidarına bâʿis-i kuvvet olmak içün, Vezâret'le be-kâm olmasını ifâde vü ifhâm etmişidi. Merkūmların kalʿaya duhûl ve emr-i muhâfazaya kıyâmları Sadrıaʿzam hazretlerine mûcib-i inşirâh-ı sadr olup, ehâlîden perâkende ve perîşân olanları cemʿ ve lede'l-iktizâ keyd-i aʿdâyı defʿ etmek bâbında tarafına hitâben mü'ekked emr-i ʿâlî ısdâr ve şimdilik Rumeli Pâyesi'yle kâm-kâr kılınup, bundan sonra ber vefk-i me'mûl hıfz-ı kalʿa ve cemʿ-i müteşerridîn ve sâyir müteretteb-i ʿuhdesi olan umûrda ibrâz-ı eser-i maʿkūl eylediği hâlde, rütbe-i Vezâret'le merâmına mevsûl kılınacağı beyânıyla, yedi bin beş yüz guruş Ordu-yi hümâyûn hazînesinden ifrâz ve tarafına irsâl ile dest-nüvâzende-i iʿzâz kılınmışidi. Kili etrafında deverân ve istirâk-ı semʿ ile o etrafın ahvâlini beyân etmek içün dört kıtʿa fırkate ve bir kıtʿa bergende irsâline dahi sebk-i fermân edüp, oldukça o havâlî mahfûz [M2 104] ve keyd-i aʿdâdan selâmeti melhûz iken, asker-i mezkûr birkaç defʿa muhârebelerden rû-gerdân ve gözü korkmuş bir tâyife-i cebân olduklarından, dâ'imâ girîve-gerd-i semt-i şikāk ve revâc-dâde-i bâzâr-ı nifâk olduklarından fazla, ednâ behâne ile ihdâs-ı uglûta ve güft ü gû ve dâyimâ terk ü neng ü ʿâr ile firârı ʿâdet ü hû[y] edüp, o makūle fesâd-endîşleri iʿmâle kādir rızây-ı Hakk'ı ve kadr-i niʿmet-i Pâdişâhî'yi bilür o tarafda bir merd-i behâdır bulunmayup, ʿâkıbet vifâkları şikāka muhavvel ve safvetleri küdûrete mübeddel olarak, Mustafa Paşa başında olan Arnabudlar'ı alup, baʿzı şey' yağma ederek Akkerman'a doğru ʿinân-ı melʿaneti irhâ eylediği haberi, Ordu-yi hümâyûn'a münʿakis oldukda, bakıyye-i askeri iʿmâl ve düşmen zuhûrunda müdâfaʿa ile iştigāl etmek irâdesiyle, Muʿasker-i hümâyûn'da mevcûd Konakçı ʿAbdî Paşa Kili'ye taʿyîn ve on beş kîse ihsânıyla maslahat-ı ʿazîmeti tehvîn olundu. Paşa-yı mûmâ ileyh Kili'ye vusûl bulmazdan mukaddem, İsmâʿîl'i istîlâ eden Ceneral Repnin bir mikdâr kefere taʿyîn edüp, on gün muhâsaradan sonra hayât-ı se-rûzeye mağrûr baʿzı ehl-i şürür müftî ile ittihâd ve o maʿkıl-ı metîni şiddet-i muhâsara görmeksizin mâh-ı mezbûrun on birinci günü istîmân ile teslîm-i hasm-ı bed-nihâd eylediler. Zikr olunan kalʿa metîn ü müstahkem ve derûnunda bulunan askerin muhâfazaya kifâyetleri müsellem olup, yirmi gün kadar muhâsaraya tehammül ve Hak Sübhânehü ve Teʿâlâ'ya tevekkül etseler idi, kurbiyyet-i mevsim-i şitâ ile sukût-i berf ü bârân düşmeni rû-gerdân etmek vârid-i hâtır-ı hûşmendân olup, ancak Dizdâr nâmıyla olan Adanalı Furûgī ve Müftî ve sâyir melʿanetkârlar yirmi gün sabr edemeyüp, kalʿa-i Pâdişâhî'yi bilâ-ıztırâb düşmene teslîm ile müstahikk-ı nefrîn-i şeyh ü şâbb oldular.