İsakçı pîş-gâhında inşâ olunup, mürûr-i sefâyin içün Kartal'dan tarafa hedm olunan cisrin sülüsânı keyd-i aʿdâdan muhâfaza içün vasatında nasb olunan haymede ikāmet [M2 103] ve emr-i muhâfazaya müdâvemet içün dört bölük neferâtı ʿalâ tarîki'l-münâvebe taʿyîn olunmuşidi. Düşmen Kartal Sahrâsı'na vürûd ve tarîk-i nehr bi'l-külliyye mesdûd olmağla, cisr-i mezkûrun nakz ve eczâsı hıfz olunmak lâzım iken, leʿalle ve ʿasâ ile imrâr-ı subh u mesâ kılınup, nâ-gâh işbu cumâdelûlânın on beşinci günü bir rîh-i ʿakīm hubûb ve orduda olan çadırların ekserini hedm ile teştît-i cemʿiyyet-i kulûb edüp, zikr olunan cisr kıtʿasının râbıtasını fekk ile dest-i emvâca teslîm ve Tuna'nın karşu tarafında vâkiʿ sazlık derûnuna îsâl ile hıdmetin tetmîm edüp, muhâfazasına me'mûr olanlar kedd ü taʿbdan fâriğu'l-bâl ve birkaç günden sonra bulunduğu mahalde eczâsı tefrîk olunup, İsakçı'nın üst tarafında vâkiʿ halîce nakl ü îsâl olundu.