Enverî Efendi merhûm inşây-ı cisrin el-hâletü hâzihî şahs-1 vâhide inhisârını beyân edüp, cisr binâsına dâ'ir şahs-ı mezkûrun bu defʿa Serdâr-ı ekrem hazretlerine ʿarz etdiği takrîr her ne kadar Baş-muhasebe defâtirine kayd ü tastîr olunmuş ise dahi, nefʿ ü fâ'ide zannıyla takrîr-i mezkûru bi-ʿibâretihi târîhine kayd eylemiş, fenn-i cedîd-i muhârebe intişâr bulduğu günden berü her vazʿın semt-i sühûleti iftikād olunup, cumûʿ-i kesîre ile idâre olunan efâʿîl ü mevâd giderek pezîrefte-i çîre-desti efrâd ü evzâʿ-ı harbiyye-i kadîmenin bi-esbâbihâ etvârı lağv olup, el-yevm ceng başka hey'ete ve esbâbı âhar sûrete girüp, şöyle ki ʿan-asl Tuna üzerine yirmi günde cisr binâsı ancak mümkin iken, el-yevm huzûr-i eczâ ile iki günde kābil-i binâ olduğu tecribe olunmuşdur. Fenn-i cedîd-i muhârebeye Sultân-ı selâtîn-i cihân-ı sâhib-kırân devr-i zemân hazretlerinin cell-i himmet-i Şâhâneleri mebzûl ve te'yîd-i dîn-i mübîn zımnında, bu fenn-i lâzimü'l-iʿtinâya iʿtibârları derece-i kemâle mevsûl olduğundan, evzâʿ-ı cisre ve sâyir esâlîb-i ceng ve aʿdây-ı kahra âşinâ Devlet-i ebed-müddet'lerinde vâfir âdem peydâ olup, lede'l-iktizâ o makūle efâʿîl-i müteceddidenin icrâsına eshel vech ile ikdâm eyleyecekleri emr-i müteyâkkan ve vâreste-i şekk ü zandır. Hükmi lağv ve Baş-muhâsebe'de kaydı olan takrîri târîhe sebt-i teksîr-i sevâd ve bîhûde tahrîk-i kalem ve sarf-ı midâd kabîlinden olduğu zihn-i nakkād ashâbına rûşendir.