Moskovlu'nun berü taraflarda nâyil oldukları fevâyid-i harbiyye hırs u tamaʿların efzûn ve Kırım Adası'na dahi sevk-i asker ile Tatar halkını ser-gerdân ü zebûn ve tıbâʿ-ı câsiyelerine melâyim-i havâdis [M2 101] ve urcûfe ilkāsıyla magrem ü meftûn etmek içün Kalmuk, ve Ten Kazağı tâyifesinden vâfir kâfir ihzâr ve Rus askeri olarak bir mikdâr kefereyi dahi bu cemʿiyyete ilhâk ile her fırkaya birer ceneral nasb edüp, muntazır-ı hulûl-i behâr olduklarını, Kırım Serʿaskeri Vezîr İbrâhîm Paşa istihbâr etmişidi. Ülke-i mezbûrenin baʿzı mahalli bahr ile muhât ve düşmenin Or Kalʿası tarafından gayri maʿberi olmayup, ibtidây-ı emirde kalʿa-i mezkûreye taʿarruz edeceklerini Kırım Serʿaskeri Vezîr Silahdâr İbrâhîm Paşa karâyin-i hâliye ile istinbât eylediğine binâʾen, maʿiyyetinde mevcûd olan cünûd-i zafer-mevʿûd ile Or Kalʿası tarafına sevk-i semend-i iclâl ve Çinişke ve Çongar boğazlarına dahi Nureddîn Sultân'ı kavm-i Tatar ile taʿyîn ü irsâl etmişidi. Hazele-i müşrikîn Or Kalʿasına bir buçuk sâʿat mesâfede hayme-nişîn ve teterrüs kasdıyla hark-ı zemîn ve top u humbara ve sâyir hisânât ile cevânib-i erbaʿalarını tarsîn eyledikleri haberi hılâl-i râhda Serʿasker Paşa semʿine vâsıl ve hareket-i müsarraʿa ile gelüp, Or Kalʿasına dâhil oldu. Ferdâsı askere icâzet ve iʿmâl-i tîr ü sinâna ruhsat vermekle, bir tarafdan Anadolu Eyâleti ve Yeniçeri dilâverleri ve bir tarafdan Kalgāy Sultân çerha şeklinde aʿdây-ı dalâlet-peymâyı ceng ü sitîze daʿvet ve düşmen dahi katanasını ihrâc ile izhâr-ı celâdet edüp, hîn-i mukābelede kavâriʿ-i rimâh u süyûf iblâğ-ı peyâm-ı hutûf ve ser-bâzân-ı İslâm şakk-ı sufûf ve gubâr-ı sümm-i semendleriyle icrây-ı hükm-i küsûf eyleyüp, bu hâl ile vakt-ı şâm hulûl ve herkes mahall-i menîʿine duhûl edüp, işbu rûz-i nusrat-bürûzda vâfir küffâr müsellim-i eyâdî-yi hazene-i nâr ve cünûd-i İslâmiyye'den ancak yirmi kadar merd-i celâdet-şiʿârın baʿzısı şiken-i zahm ile âzurde-dil ve baʿzısı rütbe-i şehâdete nâyil olarak kasr-ı dil-nişîn-i Firdevsî-mev'il eyledi. Muhârebe-i mezkûrede müşâhede olunan galebe, pür-dilân-ı İslâm'a bâʿis-i şevk-i tâm ve tabûr-i aʿdâ üzerine hücûm ü iktihâma sebeb-i cür'et ü ikdâm olup, mükemmel top ve piyâde ile harekete âmâde olduklarını düşmen ihsâs ü müşâhede eyledikde, hemân o gice meterislerini terk ve taburlarını [M2 102] fesh edüp, diyâr-ı nekbet-medârları tarafına firâr eylediler. Kasd-ı taʿkīb ile tesrîb olunan kavm-i Tatar, karargâh-ı düşmende baʿzı kalîb-i cüses-i katlâ ile imlâ olunduğunu ihbâr edüp, bu rivâyete göre, rûz-i mesâfda katî çok kâfir müdemmir-i seyf-i bâtir olduğu zâhirdir. Tabûr-i makhûr-i ʿaduvv-i istihkâmât sû-be-sû ile burc u bârû-yi muhît bir kalʿa-i tûy-der-tûy iken, eyyâm-ı vegā ile taburlarına vehn ü zaʿf-ı küllî tareyân etmeden firâra âgāzları, eser-i muʿcize-i bâkıyye-i hazret-i Nebevî olduğunda iştibâh yokdur.