Bâlâda tahrîr olunduğu üzere, Ağa Paşa'nın orduya ʿavdeti irâde ve tarafına emr-i ʿâlî firistâde olunup, müşârun ileyh ʿavdete [M2 100] âmâde iken düşmen zuhûr ve Kili tarafına ʿazîmet eylediği karʿ-ı sâmiʿa-i Sadrı's-sudûr edüp, ne vakit vürûd edeceği mechûl-i mutlak ve Ocağ-ı ʿâmire umûru müşevveş ü muğlak olduğundan gayri, Ocaklu'nun baʿzısını dahi müşârun ileyh birer sebeble tekdîr ve cümlesini dilgîr eylediği, ʿakd olunan meclis-i meşveretde zebân-zed-i sagîr u kebîr olup, ʿazli tasmîm ve şehr-i rebîʿulâhirın yirminci pazar günü Kul Kethudâsı Mehmed Ağa, Yeniçeri Ağası nasb olunup, kāʿideleri üzere silsileleri tanzîm olundu. Top ʿArabacı-başısı olan Mustafa Ağa'nın dahi, Kili tarafına ʿazîmeti menkūl ve el-yevm hâli mechûl olduğundan, ol dahi maʿzûl ve Ocak-ı mezkûr Baş-çavuşu Mehmed Ağa yerine mevsûl oldu. İsmâʿîl Kasabası'nı aʿdâ istîlâ etmek takrîbi ile berü tarafda vâkiʿ Tulça'ya sû-i kasd hâtırası ehâlîyi tevhîş ve mübtelây-ı endûh u teşvîş edüp, kalʿayı tahliye ve esbâb-ı firârı tesviye eyledikleri, sâmiʿa-res-i Serdâr-ı ekremî olmağla, o makūleleri zecr ü tahzîr ve top u mühimmâtlarında kusûr var ise işâret ü tahrîr, ʿakabinde imdâd ü iʿânede irtikâb-ı taksîr olunmayacağı siyâkında, Muʿasker-i hümâyûn'dan fermân-ı ʿâlî tastîr ve Anadolu Muhâsebecisi İbrâhîm Nazîf Efendi mübâşiriyyeti ile tesyîr olunup, mûmâ ileyh Tulça'ya vusûl buldukda, ehâlînin vahşetini teskîn, ve imdâd ü iʿânede katʿâ kusûr olunmayacağını ifade vü tebyîn etdikden sonra Ordu-yi hümâyûn'a ʿavdet ve istihkâmâta dâ'ir olan baʿzı mahallerde tabyalar inşâsıyla, toplar vazʿının eşedd-i lüzûmunu ve kalʿa-yı muhâfaza içün bin nefer dalkılıç tahrîriyle bir mikdâr topçu gönderilmesini takrîr etmekle, gerek mahall-i mezkûr ve gerek mesâmeti olan Sünne Boğazı'nın muhâfaza vü istihkâmına dâ'ir ahvâlin tesviyesi me'mûrlara havâle ve bu esbâb ile kulûb-i ehâlîde olan kalak ü ıztırâb izâle olundu.