Kartal şiddetini müşâhade edenlerin ekserîsi terk-i menâsıb ü revâtıb ve ʿazîmete tâlib olup, ez-cümle gediklülerden Feyzî Ağa Âsitâne'ye bilâ-istîzân revân olduğuna binâʾen, zeʿâmeti Defter Emîni Velî Efendi'ye tevcîh ve fî-mâ baʿd her kim firâr ve terk-i hıdmet ihtiyâr eyler ise dirliği âhara verileceği lâzım gelenlere işâʿa vü tenbîh olundu. Vukūʿ bulan şevârid-i ahvâl min-gayri icmâl ʿarz u mahzar ile hâk-i ʿatebe-i mülûkâneye ʿarz u imlâl olunup, şahs-ı vâhide isnâd-ı kusûr ve bir kimseye ʿizz ü tehâvün ü fütûr olunmayarak mühimmât ve sâyir cihât ile Şehriyâr-ı vâlâ-nijâddan istiʿâne vü istimdâd olundu.