Sevâlif-i ezmândan ziyâde Nehr-i Tuna'nın tuğyânı ve inşây-ı cisrin ʿadem-i imkânı ve Açıklar ile Serdâr-ı ekrem'in Kartal cânibine ʿubûru her ne kadar müstelzim-i muhâtara olduğu Sadr-ı müşârun ileyhin maʿlûmu olduysa dahi Hân ve sâyir vüzerâ ve Ağa-paşa'nın pey-der-pey vürûd eden tahrîrâtlarında eğerçi [M2 91] perâkende olan askerî tâyifesi cemʿ olunup, meterisler hafrıyla harbe istiʿdâd verildi. Ancak askerin mizâcında olan fesâd, cengi görmeyen ecnâda sirâyet etmeden Serdâr-ı ekrem hazretlerinin İsakçı tarafına vücûb-i ʿubûrunu îrâd etmeleriyle, bu husûs içün meclis-i meşveret ʿakd olunup, bundan sonra karşu tarafa murûrdan istinkâf, bâʿis-i fütûr-i erbâb-ı mesâf olacağını işrâb ile ehl-i şûrâ Serdâr-ı ekrem hazretlerinin mürûrunu istisvâb eylediler. Bu haber ile Sipâhîler Ağası Hatîb-zâde Kartal tarafına irsâl ve kudûm-i Serdâr-ı ekremî sebebi ile sunûf-i askerî mutayyebü'l-bâl kılınup, Ordu-yi hümâyûn'un hey'et-i asliyyesi üzere İsakçı'da terki evlâ ve vukūʿ bulan rü’yet ü îfâ ve ʿale't-teʿâkub zahîre ve gerüden gelen askeri karşuya geçürmek mesâlihiyle Nişancı ʿAbdullah Efendi Kāyim-makām nasb ve bir mikdâr meblağ dahi yedine iʿtâ olunduğundan gayri ʿilm ü feyz-tev'em Resûl-i Ekrem sallallâhü Teâlâ ʿaleyhi ve selemi leyl ü nehâr muhâfazaya ibtidâr eylemeleri husûsu dahi Süvârî Ocağları zâbitânına müʾekkeden işʿâr ve şehr-i rebîʿulâhırın üçüncü günü Ordu Kadısı Niʿmetullah Efendi ve Kethudây-ı Sadrıaʿzamî Seyyid İbrâhîm Efendi ve Şıkk-ı Evvel Defterdârı ʿİsmet İsmâʿîl Efendi ve Reʾîsülküttâb Recâ’î Mehmed Efendi ve Çavuş-başı ʿArabgirli İbrâhîm Bey ve Defter Emîni Velî Efendi ve Rûznâmçe-i Evvel Resmî Ahmed Efendi ve Muhâsebe-i Evvel Yesrî Ahmed Efendi ve Tezkire-i Evvel İbrâhîm Efendi ve Tezkire-i Sânî Mustafa Efendi ve Mektûbî el-Hâc ʿAbdurrezzâk Efendi ve Teşrîfâtî Vahdetî Ebûbekir Efendi ve Kethudâ Kâtibi Seyyid Mehmed Hayrî Efendi ve Beylikçi Mustafa Efendi'yi Sadr-ı müşârun ileyh hazretleri istishâb ve otuz bin kadar asker intihâbıyla karşuya geçüp, kudûmüne muntazır olan cumûʿ-i müslimîni vâreste-i pîç ü tâb buyurdular. Serdâr-ı ekrem hazretlerinin maksadı Kartal'da ikāmet ve Ağa Paşa ordusuna takviyyet vermek olup, ancak Hân ve Ağa Paşa ve sâyirlerinin müteʿâkib olan tahrîrâtları müşârun ileyh hazretlerinin kendülerine iltihâkından ibâret olup, bu takdîrde fî-mâ baʿd meks ü tevakkuf [M2 92] zâhir-bînân-ı askerîye sebeb-i teʾessüf olacağı maʿlûm-i erbâb-ı tasarruf olduğundan, ilerüye teşrîfleri hass ü tahrîz ve sedd-i ebvâb-ı münâkaşa vü taʿrîz kılındı. Ertesi cumʿa günü Serdâr-ı ekrem refʿ-i zer-mencûk-i ʿalem ve Ağa Paşa ordusuna karîb mahalle vazʿ-ı kadem buyurup, ferdâsı yevm-i sebt vüzerây-ı ʿizâm ve ricâl-i devlet ʿakd-i encümen-i meşveret ve beş sâʿat buʿdu olan aʿdâ taburuna mukārebet ile yurd-i mezkûrdan nehzat bâbında safka-zen-i muvâfakat olmalarıyla, vücûh-i asâkir dahi rûz-i mesâfda kalb-i bî-gişş ü sâf ile mukābele-i aʿdâdan rû-tâb-ı inhirâf olmayacağlarını ʿahd ü peymân ile teʾkîd ve bu ʿazîmetlerin sevgend ü îmân ile teşyîd eylediler. Ertesi isneyn günü Hân askeri aʿdâ süvârîleriyle tarh-ı kurʿa-i kâr-zâr ve yirmi iki nefer küştenîleri bend-i kemend-i üsâr eyledikleri haberi müşârun ileyh tarafından zikr olunan üserâ ile vâsıl-ı Muʿasker-i hümâyûn ve mûcib-i inşirâh-ı derûn olup, düşmen-i bed-tıynet kıllet-i zehâyir ile giriftâr-ı mihnet-i zarûret olduğu, Hân-ı müşârun ileyh tarafından tahrîr ve istıntâk olunan deliller dahi böylece takrîr eylediler. Düşmenin min külli'l-cihât zaʿf u muzâyakasını ve imrâr-ı ezmân ile maslahat fevt olacağını merreten baʿde uhrâ Hân ʿarz u îmâ ve bir ân akdem Sadr-ı ʿâlî-kadr hazretlerinin kudûmünü istidʿâ eylediğinden başka, iltikāy-ı tarafeyn ile sadây-ı top vâsıl-ı sımâh-ı şehâmeti oldukda, verây-ı düşmenden hücûm ve ordularını âşiyâne-i gurâb ü bûm edeceğini dahi telmîh ve bundan sonra ikāmetin maʿnâsı olmayup, sıdk-ı ʿazîmetini Serdâr-ı ekrem tasrîh eyledi.