Müşârun ileyh Babadağı Meştâsı'nda Sadrıaʿzam ve Serdâr-ı ekrem ile mülâkāt ve sefere dâ'yir miyânelerinde sebk-ı müzâkerât ʿakabinde, Bucak cânibine tahrîk-i tâziyâne-i ʿazîmet ve maʿiyyetlerinde olan asâkirin levâzım-ı harbiyyesini rü'yet ile muharremu'l-harâmın dördüncü günü Kişnev Kasabası'na nasb-ı hayme-i ikāmet etmişidi. Tatar tâ'ifesi top ve tüfenge tâb-âver olamayup, o makūle âlât-ı nâriye ile i'tilâf eden Devlet-i ʿaliyye askerinden mikdâr-ı vâfî cemʿiyyetine muzâf olmak keyfiyyetini mukaddemâ Hân-ı ʿâlişân metâlib-i sâyiresine irdâf etdiğinden, İsmâʿîl Muhafızı Vezîr Abaza Mehmed Paşa ve Mîr-i mîrân'dan Çorum Sancağı Mutasarrıfı Seyyid Hasan Paşa ve Kapucu-başı Dağıstânî ʿAli Ağa maʿiyyet-i müşârun ileyhe meʾmûr oldukça sevâd-ı cemʿiyyetleri mevfûr ve bu debdebe ile kasaba-ı mezkûreden sevk-i sutûr etmişler idi. Yaş Kasabası'nda ihtişâd eden Rusyalu'ya baş olan gebr-i zenîm ehl-i İslâm'ın ceyş-i ʿazîm ile her tarafdan hareketlerini ve Boğdan memleketini zabt niyyetinde olduklarını tashîh ile müteferrik olan askerini cemʿ u tetmîm ve o etrafı gereği gibi sedd ü tahkîm edüp, Nehr-i Prut'un kesreti ve cereyânında olan kemâl-i şiddeti, mürûr-ı askere hâyil ve cisr binâsına ihtiyâc mess eylediğini mutazammın Hân ve sâyir ru'esânın Serdâr-ı ekrem tarafına ʿarîzaları vâsıl olup, cisr inşâsına niyyet olunduğunu dahi küffâr istihbâr eylediklerine binâʾen, meʿâbir ü mesâliki top vazʿıyla tarsîn ve tabya ve sâyir istihkâmât ile tahsîn eyledikleri serân-ı askere nümâyân oldukda, piyâdenin kılleti ve inşây-ı cisrin suʿûbeti karşu tarafa mürûr kasdını fesh edüp, Hân-tepesi'nde ictimâʿ eden aʿdâ üzerine teveccüh vecîh görülüp, bu niyyet ile cânib-i mezkûre ʿazîmet olunmuşidi. Düşmen ta- buruna istihkâm ve her cânibden hey'et-i ictimâʿiyyesine nizâm verdiğinden, asker-i İslâm gâh tekaddüm ve gâh te’ahhur ile [M2 85] cenge kıyâm ve çerha sûretinde bir iki defʿa i'mâl-i seyf ü hüsâm etdiler ise dahi necâh-i merâm kesret-i piyâdeye mevkūf olduğunu birkaç defʿa Serdâr-ı ekrem hazretlerine tahrîr u iʿlâm etmeleriyle, binâ'en ʿalâ zâlik Ordu-yi hümâyûn'a vürûd eden asâkir pey-der-pey Tuna'dan imrâr ve Hân maʿiyyetine tesyâr olunduğundan fazla Rumeli Vâlîsi ve Boğdan Serʿaskeri olan Vezîr ʿAbdî Paşa dahi Rumeli Eyâleti ve sâyir tavâyif-i askerîyle ol cânibe meʾmûr ve iltikāy-ı ferîkayn ile deşt ü sahrâ mânend-i deryâ mütemevvic olduğu bu ʿAbd-i ahkara manzûr olmuşidi. Zümre-i muvahhidîn kangi geçide gelüp, cisr inşâsını tasavvur eylediler ise düşmen müsabakat ve karşu karşuya top cengiyle itʿâb-ı askerîye mübâderet etdiklerinden gayri Falcı nâm geçidden leylen düşmen mürûr ve Hân ordusuna bilâ-infısâl top atup, tarfatu'l-ʿaynda Tatar kavmini firâra mecbûr ve mâdde-i firâr sâyir askere sirâyet ve bâr ü büngâhı terk ile muʿâvedet eylediler. Bu vakʿa-i garîbeden sonra nâ-çâr Hân tarafından isti'âne vü istimdâd ve küffârın kesreti hasebiyle bi'n-nefs Serdâr-ı ekrem hazretlerinin kudûmü îrâd olundu.