Eflâk mülhakātından Krayova'da vâkiʿ Palovince (پالوونجه) nâm karyeyi tazyîk zımnında düşmen-i dîn tarafından taʿyîn olunan Donce (دونجه) nâm boyara dört nefer kapudân ve beş yüz kadar katana terfîk olunduğunu, o havâli muhâfazasına meʿmûr serdengeçdi ağaları tahkīk eylediklerine binâʾen, mukābele-i aʿdâya sîne-keş-i celâdet ve iki sâʿat kadar şedâyid-i muhârebeye [M2 79] musâberet ile düşmeni tedmîr ve mesfûr boyar ile dört nefer müteʿayyen kimseleri ve elli kadar sâyir müşrikîni küşte-i şemşîr-i berk-te'sîr eyleyüp, sâyirleri ümmîd-i necât ile müteferrik-i girîve vü felât oldukları, Vidin Muhâfızı Ahmed Paşa-zâde Vezîr Mehmed Paşa tarafından işʿâr ve bu haber-i hayr, dâfiʿu'd-dayr kulûb-i Müslimîn'i mâlâ-mâl-i hubûr ve istibşâr eyledi. Bükreş Kasabası'nı eyâdî-yi aʿdâdan intizâʿ bâbında Başbuğ nasb olunan Vezîr Sârım İbrâhîm Paşa'nın maʿiyyetine meʿmûr asâkir-i İslâm ictimâʿ ve bir ân akdem Tuna'yı karşuya mürûr ile infâz-ı emr-i Cihân-mutâʿ eylemesi, tarafına pey-der-pey tahrîr u ilmâʿ olunmuşiken, mühimmâtda olan kusûr ve sunûf-i askerîde olan fütûr, pây-i ʿazîmetine şikâl olduğunu ʿarz u imlâ etdiyse dahi îrâd etdiği ʿözr-i leng Serdâr-ı ekrem hazretlerini dil-teng edüp, bâzûy-ı iktidârına kuvvet ve binây-ı ʿazîmetine metânet kasdıyla Mîr-i mîrân'dan Mehmed Paşa'ya Rumeli Beylerbeyliği Pâyesi ihsân ve Çerhacılık ile zâtına vasf u ʿunvân verilüp, müşârun ileyhi bir ân akdem mahallinden tahrîk ve râbıta-i aʿdây-ı tefkîk vasâyâsıyla gûş-i me'mûriyyeti taʿrîk olunmuşidi. Paşa-yı mûmâ ileyh müşârun ileyhin ordusuna vusûl bulup, irâde-i devleti ifâdeye fursat-yâb olamadığını işrâb ve harekete niyyeti olmayup, hezâr-ı suʿûbetle ictimâʿ eden askere tûl-i ikāmet sebebi ile karîben teferruk tareyân eyleyeceğini beyân edüp, kazıyye-i mezkûre ʿakd olunan meclisde dermeyân kılınup, ʿazli karâr-gîr-i müsteşâr u müsteşîr ve sâbıkā Hotin Serʿaskeri ve Haleb Vâlîsi olan Vezîr Mehmed Paşa da mehâyil-i rüşd ü sedâd tecribet-güzâr-ı erbâb-ı ictihâd olduğundan, mâh-ı mezbûrun on beşinci cumʿa günü Eflâk Serʿaskeri nasbı ile tevkīr olunup, selefi Vezîr İbrâhîm Paşa mukaddemâ Silistire nizâmına me'mûr bulunmuş olmağla, meʿmûriyyeti istînâf ve tecdîd ve bir ân akdem Silistire'ye ʿazîmeti tarafına hitâben şeref-rîz-i sudûr olan emr-i ʿâlîde te'kîd olundu. Müşârun ileyh Âsitâne'de Defterdâr ve kemâl-i istiklâl ve istibdâd ile şöhret-şiʿâr iken, Sadrıaʿzam olan Halîl Paşa'nın mutasarrıf olduğu mukātaʿâtın mîrîsini talebde izhâr-ı şiddet ve müşârun ileyh dahi recây-ı mühlet ile izhâr-ı [M2 80] vech-i mülâyemet etmişiken, tabʿ-ı vekkād ve vesîle-i kurb-i istinâd ile ıtlâk-ı lisân ve Halîl Paşa dahi redd-i cevâb-ı dürüşt ile irâ'e-i hançer-i berrân eylediği, o vaktin ricâli lisânından gûş-zed-i erbâb-ı izʿân olmağla, bu sebeb ile miyânelerinde tekevvün eden sudâʿ-ı şikāk, mülte'im-i dest-i vifâk olmayacağını İbrâhîm Paşa taʿakkul ve bu meʾmûriyyetde mizâc-ı askere nazaran bir bâdire zuhûruyla telef-i nefs mühlikesini tehayyül edüp, nâ-çâr kusûr-i mühimmât ve asâkir beyninde olan ihlâlâtı sened ittihâzıyla hareketden ictinâb ü intikâs ve sühûletle nefsini istihlâs eyledi. Müşârun ileyhin ʿazl ve Silistire'ye ʿavdeti fermânı yedine vâsıl olduğu gün, aʿdânın Bükreş'den hurûcu haberi şâyiʿ olup, “Hayfâ! karşuya mürûr ve aʿdâyı müstaʾsal ve makhûr eyleyeceğimiz hılâlde ʿazlimiz zuhûr eyledi” dediği mütevâtir ü meşhûrdur. Müşârun ileyh nefsini muhâfaza ve askerinin ʿadem-i vefâsını mülâhaza ile üç mâh kadar Ruscuk'da temekkün edüp, ifâte-i evkāt ve askeri itʿâb ve taʿyîn ve mânde nâmıyla bâʿis-i isrâfât olup, halefi dahi tekmîl-i esbâb-ı ihtişâm dâʿiyesiyle bir müddet berü taraflarda ârâm ü mükâtebât ve mücâvebât ile tazyîʿ-i eyyâm eylediği hengâm düşmen-i dîn Bükreş'den hurûc ile cemʿiyyet-gâhlarına vusûl ve Mîr-i mîrân Mehmed Paşa ile Krayova Bânı Bükreş'e duhûl eylediler. Bân-ı mesfûr Krayova ve sâyir mahallerde fevka mâ yutasavver sadâkati mukarrer olup, reʿâyâyı sunûf-i vaʿd ü vaʿîd ile hasm-ı ʿanîdden tebrîd ve Fenerli takımlarının kulûbünü nâr-ı hasedle tevkīd edüp, istıhlâs-ı Bükreş ʿakabinde Eflâk Voyvodalığı'yla taraf-ı Sadr-ı muvakkardan mübeşşir olduğuna binâ'en, tahliye-i Bükreş haberi vürûdunda mesfûra Voyvodalık tevcîh ve himâyet-i reʿâyâ ve celb-i havâtır-ı zuʿafâ husûsları tarafına mü'ekked tenbîh olundu. Bükreş'den firâr ve Yaş cânibine ilgār eden ʿanede-i müşrikîn Fokşan derûnundan cereyân eden Nehr-i Seret'den güzerân olacağlarını Boğdan Serʿaskeri Vezîr ʿAbdî Paşa tahkīk ü îkān etmekle, külliyyetlü asker ile yetişüp, nehri mürûr eden küffârın baʿzısını tuʿme-i şemşîr ve baʿzısını esîr eyleyüp, bâkīsi Yaş tarafına firâr ve istihlâs-ı [M2 81] nefs-i bed-kâr eylediler.