Babadağı'nda ittihâz-ı meştâ ʿan-asl musammem olmadığından, zahîrede kıllet ve mekânda ʿadem-i vüsʿat, ricâl ü kibârı mübtelây-ı çâr-mevce-i zarûret eylediğinden başka, incimâd-ı mâ ve nâ-bûdî-yi erbâb-ı harb-i vegā ile düşmenin bir tarafdan zuhûru endîşesi ve mukāvemetin fikdân-ı imkânıyla perîşânlık ihtimâlât-ı karîbesi râhat-fersây-ı erbâb-ı nühâ olmuşiken, feyz-i rûhâniyyet-i Livây-ı Mahbûb-i Hûdâ ile o hâtıralar bi'l-külliyye zâyil ve kudûm-i behâr ve fevc fevc vürûd-i asâkir-i rîg-şumâr ile ordu halkında sebât-ı kalb ve tuma'nînet hâsıl oldu.