Eyyâm-ı behâr-ı huceste-âsâr resîde vü idrâk ve benât-ı nebât meşîme-i arzı çâk ve bûy-i dil-âvîz-i ʿanber-âmîz ile meşâmm-ı ʿâlemi ʿitr-nâk edüp, neşîb ü firâz-ı kühsâr ezhâr-ı rengâ-reng ile izhâr-ı sunʿ-i Hâlık-ı bî-enbâz ve agsân ü eşcâr destyârî-i nesîm-i ürd-i bihişt ile tebahtur u ihtizâz eyledi. Enhâr ü cedâvil sukūt-ı sayyib-i tayyib ile mütehalhil ve bürûdet-i hevâ kesb-i cevher-i safâ ile mülâyim ü muʿtedil olup, hatîb-i minber-i çemen-zâr olan ʿandelîb, meşk-i ʿaşk ile velvele-endâz-ı tilâl ü vihâd ve mürgān-ı ülî-ecniha ihtilâf-ı lügāt ile isbât-kerde-i bahs-i meʿâd oldu. Sahn-ı mürg-zâr nesrîn ü benefsic ile behcet-bahş-ı menâzır ve lâle-i dagdâr-ı reng-i ahmer kānı ile küşâyende-i hâtır-ı dîde-i nergis-i hâb-düşmen nigehdâr-ı tâc-ı nesteren ve giyâh-ı nev-demîde sitâyiş-i nazrat ü hazratıyla gûyây-ı [M2 76] İyyâke ve hadra'e'd-dimen oldu. Bu esbâb ile fî-mâ baʿd Ordu-yi hümâyûn'un meştâda ikāmeti münâsib ve bir ân akdem sahrâya hurûcu vâcib olduğuna binâ'en muharremü'l-harâmın ikinci günü kānûn üzere Dergâh-ı âlî yeniçerileri ve dördüncü günü müretteb alay ile Sadrıaʿzam ve Serdâr-ı ekrem cenâbları Livây-ı fevz iltivâ-yı Fahr-i ʿâlem'i pîşuvây-ı menhec-i saʿâdet eyleyerek, Babadağı Meştâsı'ndan dürre-zen-i hareket ü kıyâm ve mukaddemâ ihtiyâr-kerde-i erbâb-ı nakz u ibrâm olan kazây-ı dil-güşâda nasb olunan hıyâm-ı Süreyyâ-nizâma pâ-nihâde-i ʿizz ü ihtişâm oldu.