Müşârun ileyh Şeyhulislâm-ı merhûm Pîrî-zâde Mehmed Sâhib Efendi'nin cürsûme-i pâkîzesi olup, eyyâm-ı civânîde lisân-ı hâl ile [mısra]: ʿUlâ'ike âbâ'î fe-ci'nî bi-mislihim mefhûmuyla terâne-sâz ve medrese ru'ûsuyla kāmet-efrâz-ı imtiyâz olup devre-i muʿtâdeyi tekmîl ve Mevleviyyet rütbesini tahsîl ve bir müddetden sonra Mekke Pâyesi'yle tatyîb ve Meşîhat-i pederîde İstanbul Kadılığı ile tatrîb olunup, üç mâhdan sonra istîfâ ve ihrâz-ı pâye ile iktifâ etmişidi. Yüz altmış beşde Anadolu Kadıʿaskerliği dîbâce-i ʿunvân-ı ikbâli olup, müddet-i ʿörfiyyesin itmâm ve altmış dokuzda Sultân ʿOsmân Hân hazretlerine birkaç mâh imâmet ile ihrâz-ı dest-mâye-i merâm edüp, sene-i mezbûre vasatında Rumeli Sadâreti'ne şâyân ve yetmiş târîhinde ʿazl ve Burusa'ya tağrîb ile dil-rîş-i hümûm ü ahzân olup, zemân-ı ikāmeti medîd olmuşiken, hakkında lutf-i İlâhî bedîd ve kayd-ı gurbetden intılâk ile yevm-i mükfehirr-i emeli hem-reng-i sabâhu'l-ʿîd olup, yetmiş beşde mükerreren Sadr-ı Rum ve yedi mâh icrây-ı ahkâm ile fâsıl-ı mâ-beyn-i husûm olup, yetmiş [M2 75] dokuzda merreten baʿde uhrâ Sadâret-i mezkûre ile kâm-revâ ve birkaç mâhdan sonra istiʿfâ ve ihtiyâr-ı meslek-i inzivâ etmişiken, seksen iki târihinde Müftiyyü'l-vakt bulunan Veliyyüddîn Efendi rıhlet ve müşârun ileyh Mesned-i Fetvâ ile kesb-i etemm-i rifʿat eyledi. Seksen üçde fevt ve mazhar-ı “Küllü nefsin zâ'ikatü'l-mevt” olup, Murâd Paşa Câmiʿi hazîresinde o tavd-ı bâzıh-i ʿulûm ü fünûn mütevârî ve medfûn oldu. Müşârun ileyh ser-âmed-i ʿulemây-ı Rum ve fehm ü dânişi zâhir u maʿlûm olup, nazm ü nesre kādir ve cedel ü bahsde misli nâdir ve Sâhib mahlası ile manzûr olan gazel ve târîhleri rengîn ve makbûl-i tibâʿ-ı bülegāy-ı maʿârif-âyîn olup, ekser evkātı müdârese-i ʿulûm ile geçüp, ʿAbdullah Monla ve Gelembeli ve Küçük Âmedî gibi fuhûl dâyiresine tereddüd ve duhûl ve mübâhase-i gûnâ-gûn ile meclisini merkez-i dâyire-i menkūl ü maʿkūl ederler idi. Ebnây-ı cinsi her hâline hased ve der-i mesâvîsini feth ve mehâsinini sedd edüp, hattâ vefâtında: “Lâ tesübbü'l-emvâte fe-innehüm kad efdû mâ kaddemû” mefhûmundan ʿadem-i iʿrâz ile: Nazm: Mâte'l-hannâs (مات الخناس) târîhini inşâd ve nâr-ı ʿadâvetlerini îkād eylediler. Lisân-ı ebnây-ı zemân ile cerîhu'l-cenân oldukları hasebiyle: Nazm: ʿOsmân-ı sitem-dîde (عثمان ستم دیده) terkîbi vefâtlarına târîh vâkiʿ olduğu garâyib-i ittifakıyyâtdandır.