Hasm-ı bed-kîş memâlik-i mahrûseye ilkāy-ı fesâd [M2 69] ve teşvîşden hâlî olmayup, ez-cümle müstaʿidd-i ʿisyân ve behâne cûy-i tuğyân olan Mora reʿâyâsını gûnâgûn tesvîlât ü tergîbât ile ıdlâl ve o havâlîyi berhem-zede-i ihtilâl eyledikleri etvâr-ı reʿâyâdan istidlâl olunup, takviye-i kılâʿ ve tarsîn-i bikāʿ lâzım geldiğini serhad-nişînler tafsîl ü işbâʿ etmeleriyle, her kalʿaya mücâvir olan kasabât ü kurâdan tashîh tarîkıyla vâfir asker tahrîr ve kılâʿ-ı mezkûreye teşhîn ile icrây-ı hüsn-i tedbîr kılındığından başka, Dukakin Mütesellimi Hudâverdi-zâde Ahmed Bey kendü malından kifâyet mikdârı asker tanzîm ve bu defʿa İnebahtı tevcîh olunan Vezîr Mustafa Paşa maʿiyyetine varup, emr ü nehyine imtisâl eylemesi tarafına tefhîm ve bu mukābelede Mîr-i mîrânlık ile ber-murâd ve Dukakin Sancağı'yla neşîde-i ikbâli müstezâd kılındı.