Cezîre-i Mora'da şuyûʿ bulan ihtilâl muhtemelü'l-vukūʿ olduğuna binâ'en, Yenişehir'de bir vezîrin vücûdunu erbâb-ı elbâb istisvâb eylediklerine binâ'en, Yeniçeri Ağalığı'ndan infisâl ile Dimetoka'da müterakkıb-ı ʿâtıfet-i Şehriyâr-ı deryâ-nevâl olan ʿOsmân Ağa'ya rütbe-i Vezâret ile Tırhal'a Sancağı ʿinâyet ve o havâlîye itâre-câsûs-i fikret ile muhâfazaya dikkat eylemesi tarafına mü'ekkeden tahrîr ü işâret olundu. Vidin tevcîhiyle Haleb Eyâleti bundan akdem mahlûl olup, Silistre nizâmına me'mûr sâbikā Rumeli Vâlîsi Vezîr Mehmed Paşa'ya tevcîhi emr-i maʿkūl görüldüğünden başka, Niğbolu etrafı muhâfazaya Karaman Vâlîsi Vezîr Süleyman Paşa taʿyîn ve Yeni kalʿay'ı muhâfaza şartıyla Kefe Eyâleti, bâ-rütbe-i Mîr-i mîrânî ʿAbdulvelî nâm kimseye tevcîh ile o taraf dahi tahsîn olundu. İki bin nefer süvâriyle mukaddemâ Ordu-yi hümâyûn'a me'mûr ve bu mukābelede Mîr-i mîrânlık ve Marʿaş Eyâleti ile mesrûr olan Hamevî-zâde ʿÖmer Paşa olmikdâr süvâriyle hareket, tavk ü kudretinden hâric idüğünü inhâ ve taklîlini recâ etdiğine binâ'en, eslâfı gibi sekiz yüz nefer süvâriyle isbât-ı vücûd etmek üzere matlabı pür-sûd kılındı.