Memleket-i Eflâk giriftâr-ı dest-i hasm-ı bî-mîsâk olduğuna binâʾen, kenarda vâkiʿ bazı kurâ halkını taraflarına münkād etmek içün üzerlerine şeyâtîn-i rehâbîni taslît ve bi-hükm-i cinsiyyet o makūle bî-hûşları nîreng ü füsûn ile tağlît etmişler idi. Reʿâyâ ise, el-Hükmü li-men galebe, lâ li-men herebe kavliyle ʿamel ve seby ü istirkāk mâddesini dahi ihsâs ile müdârâ-yı düşmeni kusârây-ı emel ederek zarûrî mümâşât ve zehâyir ve sâyir cihât ile iʿânetde selb-i taksîrât ederler idi. Binâʾen ʿalâ zâlik Eflâk kurâsından Nehr-i Olt kenârında vâkiʿ Islanta (اصلانته) Karyesi halkını minvâl-i muharrer üzere taraflarına cezb ve derûnuna bir mikdâr asker vazʿından başka karşuda vâkiʿ Krayova Kazâsı'na dahi tamaʿ etdikleri haberini Vidin Muhâfızı Vezîr Mehmed Paşa celb edüp, Vidin yamaklarından ve dâyiresi halkından bir mikdâr asker intihâb ve Tuna'yı karşu geçürüp, Krayova semtine izhâb etmişidi. Düşmene meyl ile zümre-i havâneye zeyl olan Eflâk Voyvodası tarafından Krayova'ya nasb olunan Bân Voyvoda'nın Moskovlu'ya tebeʿiyyetinden gazbân olup, hıdmet-i devleti sermâye-i iftihâr ʿadd ü şümâr ederek Krayova'yı vikāye ve Eflâk derûnunda olan Arnabûdlar'ı başına cemʿ ile icrây-ı hakk-ı himâye eylediğinden başka, hareket-i aʿdâyı nev-be-nev Vidin Muhâfızı'na tahrîr ile îfây-ı hakk-ı sadâkatde irtikâb-ı taksîr etmez idi. Vidin askerinin mürûrunu tahkīk etdiği ân ictimâʿa şitâbân ve asker-i mezkûru alup, Krayova etrâfında olan küffâr-ı hâksâr ile birkaç defʿa tarh-ı kurʿa-i kâr-zâr ve inkızây-ı mevsim-i şitâya dek o havâlîyi masûn-i gezend-i eşrâr eylediği, resîde-i derece-i iştihâr olup, kâyinen men kân uġūr-i Devlet'de fedây-ı cân eden hidmet-güzârâna iltifât ü nevâziş sâyirin mâye-i hamiyyetine sebeb-i efzâyiş olacağı zâhir olduğundan, Bân-ı mesfûr Ordu-yi hümâyûn'a ihzâr ve ilbâs-ı [M2 67] hilʿatle minnet-dâr kılındığından gayri, kemâ fi'l-evvel Vidin askeriyle muhâfaza-i enhâ ve celb-i reʿâyâya ıkdâm etmek husûsları zarf-ı sâmiʿasına ilkā olunup, şöyle ki dil-hâh-ı Devlet ʿaliyye üzere izhâr-ı sadâkat etdiği hâlde husûl-i matlabıyla mesrûr ve harâbe-zâr-ı emeli maʿmûr olacağı vaʿd-i bî-mutâliyle geldiği semte irsâl olundu. Mesfûr bu ümniyye ile Krayova'ya vâsıl oldukda, zîr-i idâresinde olan reʿâyâyı Moskovlu iġfâl üzere olduğunu istidlâl ve nush u pend ile mesfûrları vâreste-i şikâl-i mekr u âl eylediğini düşmen tahkīk ve müretteb tabur ile tâht ü târâc kasdında olduğunu Bân-ı mesfûr Vidin tarafına tenmîk ve müşârun ileyh ke'l-evvel asker tertîb edüp, bi'n-nefs Kethudâsını terfîk edüp, asker varıncaya dek düşmen Olt suyunu mürûr ve nehb ü ġāretle reʿâyây-ı bî-huzûr eyledikleri müşâhede olundukda, her tarafdan düşmen üzerine hecme-endâz-ı celâdet ve ekserîsini tuʿme-i şemşîr-i salâbet ve bakıyyesi hâl-i münkalib ve nefs-i muzdarib ile nehri güzâr ve Bükreş tarafına ılgār eylediler.