Müşârun ileyh Sadr-ı esbak Çorlulu ʿAli Paşa merhûmun hafîdi ve Gül Ahmed Paşa'nın necl-i reşîdi olup, Rikâb-ı hümâyûn'da Mîrâhûr-ı Sânî ve Kapucular Kethudâsı ve Mîrâhûr-ı Evvel hidemâtıyla mübeccel ve Kantarcılar'da kâyine olan Hânım Sultân cenâblarını evride-i hibâle-i nikâh ve bu sebeble şeb-i deycûr-ı bahtını hem-reng-i beyaz-ı sabah edüp, Firdevs-mekân Sultân ʿOsmân merhûmun mutarrah-ı eşiʿa-i nazar-ı ʿâtıfeti olarak rütbe-i Vezâret'e irtikā ve Rumeli Eyâleti'yle ser-menzil-i ikbâle iʿtilâ edüp, cild-i evvelde tafsîl olununan esbâb-ı zâhire müşârun ileyhe bâʿis-i ʿazl ü nefy ve musâdere olup, üç seneye karîb İstanköy'de mukīm ve muntazır-ı lutf-ı Hüdâvend-ı ʿalîm olmuşiken Vezâret'i ibkā ve İç-il Sancağı'yla ihyâ olunmuşidi. Baʿdehû Cidde mansıbı ile mübâhî ve pederleri gibi Şerîf-i Mekke ile muʿâraza ve münâkaşa eyleyerek bilâ-emr-ı Pâdişâhî berren Mısır'a râhî oldu. Hâlini Devlet'e ʿarz u tefhîm ve Adana Eyâleti ile iʿzâz ü te'vîm ve birkaç mâh mürûrundan sonra Aydın Muhassıllığı ile çeşm- i bahtı rûşen ve bir seneden sonra Anadolu Eyâleti tevcîh olunup, kapusuz eşkıyâsının teftîş ü istîsâline bi'n-nefs ʿâzîmetle hidmeti müstahsen olmuşidi. Sadr-ı esbak Mustafa Paşa'nın talep etdiği ʿubûdiyyetde taksîr eylediğine binâʾen, tekdîr irâdesiyle mansıbından ʿazl ve Diyârbekir'e tesyîr edüp, çok giçmeden Halebü'ş-şehbâ Eyâleti ile sûd-mend [M2 55] ve az müddetde İç-il Sancağı'na sevk-i semend edüp, mansıb-ı mezkûr dahi pây-dâr olmayup, birkaç mâhdan sonra Eyâlet-i Sivas'a tahvîl ve Sefer-i hümâyûn'a me'mûriyetle Bender'e vürûdunda İlsâvât ve baʿdehû Bender Serʿaskerliği'yle tebcîl olunmuşidi. Bâlâda tahrîr olunduğu vech üzere vefât ve terk-i vedîʿa-i hayât eyledi. Müşârun ileyh hüsnü's-sûre, muʿtedilü'l-kāme edîb ü vakūr ve dâniş ü hüner ile meşhûr, ʿâkil ve dirâyet-mend ve akrânı miyânında ser-bülend bir Vezîr-i ʿadîmü'n-nazîr idi. Vâlî olduğu memâlikde ʿadl ü nasafeti zâhir ve reʿâyâ vü berâyâ sâyesinde mecbûru'l-hâtır olup, kesret-i îrâd-ı tabîʿî ile her diyârda sâlik-i meslek-i iktisâd ve dâyiresi kemâl-i zînet ü intizâm ile dâğ-zen-i kulûb-i hussâd idi. Bu Fakīr'den ʿÖrfi Kasayidini ve Makāmât-ı Harîrî'yi temâmen kırâ'et ve üç sene dâyiresinden münfek etmeyüp, kadr-i ʿâcizâneme fevka'l-meʾmûl hürmet ile mazhar-ı sunûf-i mekremet eyleyüp, vefâtından sonra rûh bedenden müfârakat eder gibi merhûmdan cüdâ ve bir zemân bu elem-i cângâh ile serserî geşt-i deşt ü sahrâ oldum. Sinnî-yi ʿömri altmış beş ʿakdine makrûn ve Bender'in iç kalʿasında vâkîʿ mekābir-i vüzerâda medfûn oldu.