Müşârun ileyhin vefâtı hasebiyle Bender Serʿasker'liği mahlûl ve efrâd-ı müteʿayyineden birinin nasbı rütbe-i vücûba mevsûl olduğuna binâʾen, Kethudây-ı Sadrıaʿzamî bulunan Yazıcı İbrâhîm Paşa-zâde Mustafa Beyefendi'nin Vezâret'e heveskâr olduğu, maʿlûm-i Sadr-ı kâm-kâr olmağla, işbu şehr-i recebin yirmi üçüncü günü Aydın Sancağı ilhâkıyla Bender Serʿaskerliği mîr-i mûmâ ileyhe ihsân ve umûr-i lâzimesini rü'yet içün bir hafta kadar Ordu-yi hümâyûn'da meksine ruhsat verilüp, itmâm-ı mehâmmı ʿakabinde Bender cânibine ʿazîmeti fermân olundu. Rûznâmçe-i Evvel olan Resmî Ahmed Efendi, ʿazâyim-i umûr-i Devlet'de istihdâm olunarak mâhiyyeti maʿlûm- i kâr-dânâyân-ı zemân ve Kethudâlık mesned-i refîʿine istihkākı bî-şübhe vü gümân olmağla, şehr-i mezkûrun yirmi ikinci günü o câh-ı refîʿ ile cezelân kılındı. Başbâkî-kulu olan Eyyûbî Ahmed Ağa bilâ-sebeb mansıbını terk [M2 56] ile Âsitâne-i saʿâdet'e ʿazîmet eylediği maʿlûm-i Sadr-ı vâlâ-menkabet olup, ʿavdetiyçün ısdâr-ı misâl ve verâsından mahsûs mübâşir irsâl olunmuşiken, emr-i şerîfe ʿadem-i itâʿat ve mübâşirini âzürde-i ʿunf ü nahvet etmekle, yerine âharın nasbı lâzım gelüp, Sadrıaʿzam hazretlerinin Kethudâsı Hasan Ağa mansıb-ı mezkûr ile kâm-revâ oldu.