Müşârun ileyh Bender üzerine gelen aʿdâ ile birkaç defʿa muhârebe edüp, fazl-ı Hakk ile her defʿada gālib ve seyf-i savletinden düşmen mağlûb u hârib olup, endîşe-i fitne vü fesâd dâyimâ muʿtâdları olan Bender yamakları Ayağ Dîvânı talebiyle pâ-bercây-ı merkez-i ısrâr ve merâmları bir iki ihtiyârlarıyla iblâğ olunmak taraf-ı müşârun ileyhden işʿâr olunduysa dahi ʿadem-i kabûl ile redd-ı ahbâr [M2 54] etmişler idi. Bi'z-zarûre merâmlarına müsâʿade olunup, müstağrak-ı silâh ve âmâde-i kifâh olarak Serây'a vürûd ve emr-i muhâfazada baʿzı taksîrât isnâdıyla lisân-ı hezeyânı memdûd eylediler. Müşârun ileyhin dâ'iresi fevka'l-had ve etrâfı asker-i mevvâc ile müşeyyed bulunduğundan rekîz-ı zamîrleri olan habâsete zafer bulmayup, ricʿat-ı kahkarî ile ʿavdet ve merkūmların perde-birûn olan vazʿ-ı nâ-hem-vârları müşârun ileyhi tekdîr ve hâric-i dâyire-i hadd ü edeb olan tahakkümleri, tabʿ-ı nâziklerine teʿsîr edüp, bir iki günden sonra ʿillet-i insibâb ile bî-mâr ve taʿtîl-i cevârih ile bî-zâr olup, Cumâdelâhire evâsıtında terk-i cân ü ser ve dâr-ı âhirete sefer eyledi.