Müşârun ileyhin maʿiyyetine meʿmûr olan vüzerâ ve rüesâ ve sâyir askerînin ekseri betâʾet üzere hareket ve maʿiyyet-i müşârun ileyhe ʿazîmetden intikâs ile oldukları mahalde ikāmet ve bu keyfiyyete Sadriaʿzam vukūf ile pey-der-pey istiʿcâl emri ısdâr u irsâl eyler idi. Anadolu Vâlîsi Feyzullah Paşa: “Dâyirem bi'l-külliyye perişân ve maʿiyyetimde ancak beş on âdem kalup, bu hâl ile hareket, hâric-i dâyire-i imkân olduğunu” beyân ve sâyir me'mûrlar dahi bu iʿtizârât ile itāʿat-ı fermân eylemeyüp, Serʿasker Paşa maʿiyyetinde ancak beş altı yüz kadar âdem mevcûd ve bâ-husûs Boğdanlu vâsıtasıyla ehl-i İslâm'ın kâffe-i ahvâline aʿdâ muttaliʿ olup, tehâlüf-i cünûd ile nüfûzun intifâsına ve serhadlerin askerden huluvv u ferâğına vâkıf olup, Kalas üzerine hücûm ve cenge mübâşeret ve Serʿasker Paşa dahi mevcûd-i maʿiyyeti olan behâdırân ile hâric-i kasabada mukābeleye kasd u niyyet eyleyüp, [M2 53] henüz âteş-i harb gereği gibi müştaʿil olmadan, kasaba derûnunda olan reʿâyâ ʿahd-i nihânîye binâʾen, bi'l-külliyye taraf-ı aʿdâya meyl ve müşârun ileyhin dâhil-i kasabada olan hazînedâr ve sâyir etbâʿını hışt ü seng ve sâyir âlât-ı ceng ile katl eylediklerinden gayri Boğdan Beyi'ni bend-i kemend eyleyüp, Serʿasker Paşa'nın başında olan sipâh-ı endek-şumâr dahi birer tarafa firâr eylediğinden, nâ-çâr kasabaya ʿavdet ve vâkıf-ı keyfiyyet oldukda kasabada olan havene-i reʿâyâ kendüsünü dahi esîr etmek iddiʿâsında olduklarını idrâk ile Nehr-i Prut kenârında olan Açıklara süvâr ve terk-i kâr u bâr ederek berü tarafa güzâr ve vâkiʿ olan hadise-i hevl-nâki Ordu-yi hümâyûn'a işʿâr eyledi. Müdâfaʿa-i aʿdâya tekayyüd eder o taraflarda şahs-ı vâhid kalmadığını düşmen tahkīk ve kasaba-i mezkûre derûnuna duhûl ile reʿâyâya izhâr-ı rûy-i ilf ü tezrîk etdikden sonra Eflâk tarafına sevk-i tabûr-i makhûr ve Eflâk Voyvodası Ligor'u meʾsûr eyledi.