Esfâr-ı sâbıkada Serdâr-ı ekrem bulunanlar ekser evkātda Âsitâne'de kışlayup, bi'l-iktizâ evvel-behârda yine maʿreke-gâh-ı cünd ü sipâha teveccüh ederler idi. Bu kıyâs ile Hân-tepesi'nden Âsitâne'ye varınca baʿzı mahallere zehâyir ihzârı ve sabu's-sülûk meʿâbirin tathîri zımnında mübâşirler tesyâr ve bu kazıyye havâtır-ı ru'esâda ızmâr olunmuşidi. Düşmenin serhadd-i Hâkānî'ye istîlâsı ve berü taraflara tecâvüz ü iʿtidâsı hasebiyle Tuna'nın bu cânibinde meştâ ittihâzıyla İbrâ'îl ve Kalas ve Maçin ve Silistire'yi keyd-i düşmenden muhâfaza evlâ olduğunu Serdâr-ı ekrem fikr ü mülâhaza etmekle, keyfiyyet hâk-kadem-i Şehriyârî'ye bâ-takrîr ifâde ve işâret olunduğuna binâ'en, Âsitâne-i saʿâdet'de bu husûs münʿakid olan meclis-i meşveretde müzâkere olunup, Sâhibu'd-dâri üdrî bi-mâ fîhâ kavli üzere Ordu-yi İslâm'da olan zevât-ı müteşahhısa, mevziʿ-i meştây-ı ihtiyârda terhîs olunmak re'yi savâb idüğünü îmâ eylediklerine binâ'en, tercîh olunan mahalde meştâ-nişîn ve serhadleri muhâfaza ile defʿ-i gezend-i aʿdâ-yı dîn tenbîhâtını hâvî hatt-ı hümâyûn şeref-rîz-i vürûd olmağla, herkes hevâsına muvâfık olan mahalli tezkîr ve baʿzıları küllî mehâsin beyânıyla Âsitâne tarafın tedbîr edüp, bil-âhıra Babadağ'ı her cânibe mütekārib ve min külli'l-vücûh meştâ ittihâzına münâsib olduğunu hayr-hâhân-ı devletden baʿzıları tasrîh ve Edirne ve Âsitâne'yi sevk edenlerin reʿylerini delâyil-i mülzime ile takbîh eylediler ise dahi, Silistire'nin evleviyyeti karârgîr olup, şehr-i recebin onuncu günü İsakçı'dan hareket tasmîm ve Konakçı Paşa kānûn üzere bir gün evvel askere takdîm ve ordu halkının baʿzısı Silistire niyyeti ile o tarafa ʿazîmet ve Ordu-yi hümâyûn dahi ʿale's-seher hareket etmek üzere iken nâ-gâh Tuna tarafından top sadâları ʿâlem-gîr ve istihbâr-ı ahvâl içün Ordu'nun hareketi giriftâr-ı ʿukde-i te'hîr olup, mekr-i düşmen-i şûm Kalas üzerine hücûm ve cünd-i İslâm [M2 52] müdâfaʿa vü mukāteleye ikdâm ederler imiş. Bu sebeble Ordu-yi hümâyûn'un hareketinden evvel Silistire'ye ʿazîmet edenlerin iʿâdesiyçün âdemler irsâl ve Ordu-yi hümâyûn'dan ve İsakçı ve sâyir mahallerden imdâd içün asker tahrîrini bi'l- cümle kibâr u ricâl lâzım-ı hâl ʿadd etmişler idi. İlerü gidenler Babadağı'na vusûl ve ʿavdetleri irâdesinden bir mahalle meʾmûriyyet maʿnâlarını istınbât ve şiddet-i şitâ ve nâ-tüvânî-yi çârpâ behâneleriyle zimnen ʿavdetden nükûl eyledikleri ve İsakçı'dan tertîb-i asker müşkil ve Babadağı'na vardıkdan sonra her şey mümkin ve kābil olduğunu baʿzı kimseler Sadriaʿzam hazretlerine ilkā ve bi'z-zarûre livây-ı şerîfi alup, bekāyâ-yı asker ile Babadağı'na sevk-i matâyâ eyledi. Şöyle ki, kasaba-i mezkûrede birkaç gün ikāmet ve imdâd lâzım olan mahallere asker ve vech-i âhar ile iʿânetden sonra musammem olan Silistire meştâsına ʿazîmet edecekler idi. Babadağı Sahrâsı'nda şiddet-i sermâ ile ikāmet, hâric-i hîta-i vüsʿ u tâkat olduğundan herkes kasabaya girüp, birer hâne tedârüküyle tahsîl-i râhat ve kâfât-ı şitâ tedârüküne sürʿat edüp, bu takdîrde Silistire'ye ʿazîmet râbıtası münhal ve Sadr-ı ecel içün dahi derûn-i kasabada taʿyîn-i mahal kılındı.