Ordu-yi hümâyûn'un meştâya ʿavdeti ʿakabinde Bender Serʿaskeri Güllü Ahmed Paşa-zâde el-Hâc ʿAli Paşa, râyet-i himmeti tehzîz ve Moskovlu ile ittihâd eden Lehlü'nün Turla karşusında olan karyelerine bir mikdâr asker techîz edüp, nâyil-i nefl ü ganîmet ve seby ü istirkāk-ı üserâ ile ʿavdet etmişleridi. Boğdan reʿâyâsından olup, Devlet-i ʿaliyye'ye muhâlefet ve aʿdây-ı dîne mutâvaʿat edenlerin dimâ-i fâsideleri ihrâk ve evlâd ü ʿiyâlleri istirkāk olunmak üzere bu esnâda kıbel-i Şerʿ-i enver'den verilen fetvâ o makūle gerden-pîç-i tavk-ı inkıyâd olanların mesmûʿu olup, ehl-i İslâm'ı işgāl ve düşmene sevk-i menâfiʿ-i ahvâl kasdıyla Bender'de olan asker perîşân ve zabt-ı kalʿa âsân olduğunu taraf-ı hasma işâʿa vü iʿlân etmişler idi. Düşmen dahi yirmi bin kadar asker ile Bender'in karşu tarafından zuhûr ve maʿiyyet-i Serʿaskerî'de tehaşşüd eden dilâverlerden cemʿ-i kesîr, aʿdâyı tedmîr kasdıyla o tarafa mürûr edüp, Hân-ı âlîşân dahi bir tarafdan düşmen-i bed-tıynete endâhte-i tîr ve darb-ı şemşîr ve o fırka-i dâllenin vâfirini dereke-i cahîme tesyîr edüp, bakiyyetü's-süyûf olan küffâr hûk-i zahmhurde gibi serdâde-i vâdî-yi idbâr olmağla, asker-i İslâm vâyedâr-ı nasr-ı Melik-i ʿAlâm olduklarını Hân-ı ʿâlîşân ve Serʿasker [M2 51] Paşa ifâde ü iʿlâm eylediklerinden, tirkeş-behâ ve Segbân ʿulûfesi nâmıyla Hân-ı müşârun ileyh tarafına yüz bin guruşa karîb meblağ inʿâm ve Serʿasker Paşa'ya dahi nakd-i vâfir ile ikrâm olundu.