Ordu-yi hümâyûn'un Hân-tepesi'nden rıhleti ve İsakçı'ya ʿazîmeti aʿdâya münʿakis oldukda, Yaş cânibine hücûmları hasebiyle mukaddemâ peyvend-i muʿâhedeye bend etdikleri Boğdan reʿâyâsı dahi cemʿiyyetlerine mültehak ve Yaş muhâfızı olan müşârun ileyhin tarafında bulunan Boğdanlu dahi giderek müteferrik olup, aʿdâ ile mukābele vüsʿundan hâric olduğunu mülâhaza ile Boğdan Voyvodası'nı istishâb ve Tomarova tarafına ʿazm ü şitâb ve düşmen dahi Yaş kasabasını hâlî bulup, askerini idhâl ve etrâfına meteris ve hendek hafrıyla reʿâyâyı işgāl eylediğinden başka Yaş'dan zahîre nakli maslahatı içün sâhil-i Nehr-i Prut'da merbût olan kayıklara hücûm ve mellâhlarıyla cidâl ve birkaç nefer ehl-i İslâm'ı zümre-i şühedâya îsâl eyledikleri İsakçı'da semʿ-i Serdâr-ı ekremî'ye vâsıl ve budan sonra kasd-ı aʿdâ İbrâ’îl ve Kalas havâlîsine olduğuna baʿzı erbâb-ı vukūf ikāme-i delâyil eylediler. Rakka Vâlîsi Dümdâr Mehmed Paşa [M2 50] Ordu-yi hümâyûn'a henûz vârid ve kapusu halkı sâyirlerinin kapusu halkından zâyid olup, Kalas havâlisinde ikāmetle Devlet-i ʿaliyye tarafına müncezib olan reʿâyâyı vikāye ve İbrâ'îl muhâfızı Vezîr ʿAbdî Paşa ile muhâbere ve lede'l-iktizâ düşmen ile muhârebe husūsu müstasveb-i erbâb-ı istişâre olmağla, Boğdan Serʿaskerliği hilʿatı dûş-i istihkākına iksâ ve mâh-ı mezkûrun on dokuzuncu günü Maçin üzerinden savb-ı maksûda isrâ ve Abaza Paşa ve Anadolu Vâlîsi Feyzullah Paşa ve Selânik Mutasarrıfı Mehmed Paşa ve Canikli ʿAli Bey, dâyirelerinde mevcûd asâkir ile müşârun ileyhin maʿiyyetine varup, her hâlde emr u re'yine mutâvaʿat ve emr-i yek-cihetî ve ittihâda riʿâyet eylemeleri bâbında her birine başka başka ısdâr-ı misâl-i lâzimü'l-imtisâl kılındı.